അങ്കാര: ഫ്രാന്‍സ് പ്രസിഡന്റ് ഇമ്മാനുവേല്‍ മക്രോണിനെതിരെ രൂക്ഷവിമര്‍ശനവുമായി തുര്‍ക്കി പ്രസിഡന്റ് റെജപ് തയ്യിപ് എര്‍ദൊഗാന്‍. രാജ്യത്തെ മുസ്‌ലിം വിഭാഗത്തിനിടയില്‍ കൊണ്ടു വരുന്ന പുതിയ നയങ്ങളെ ചൂണ്ടിക്കാട്ടിയാണ് എര്‍ദൊഗാന്റെ വിമര്‍ശനം. ഇസ്‌ലാം ആഗോള തലത്തല്‍ പ്രതിസന്ധി നേരിടുകയാണെന്ന മക്രോണിന്റെ പരാമര്‍ശം തുറന്ന വെല്ലുവിളിയാണെന്നാണ് എര്‍ദൊഗാന്‍ ആരോപിച്ചത്.
നിങ്ങളാരാണ് ഇസ്‌ലാമിന്റെ ഘടനയെ പറ്റി സംസാരിക്കാന്‍? എര്‍ദൊഗാന്‍ ടെലിവൈസ് പ്രസംഗത്തില്‍ ചോദിച്ചു. ഒപ്പം ഒരു കൊളോണിയല്‍ ഗവര്‍ണറെ പോലെയല്ലാതെ ഉത്തരവാദിത്തപ്പെട്ട പ്രസിഡന്റായിയിരിക്കും മക്രോണ്‍ എന്ന് പ്രതീക്ഷിക്കുന്നതായും എര്‍ദൊഗാന്‍ പറഞ്ഞു.
ഫ്രാന്‍സിലെ മുസ്‌ലിം ഗ്രൂപ്പുകള്‍ വിദേശ രാജ്യങ്ങളില്‍ നിന്നും സഹായം സ്വീകരിക്കുന്നത് കുറയ്ക്കുന്നതിനുള്ള പദ്ധതികളാണ് മക്രോണ്‍ പ്രഖ്യാപിച്ചത്. മസ്ജിദുകള്‍ക്ക് വിദേശ രാജ്യങ്ങളില്‍ നിന്നുള്ള ഫണ്ടിംഗ് വിലക്കുന്ന ശക്തമായ നിയമങ്ങളാണ് പുതുതായി കൊണ്ടു വന്നിരിക്കുന്നത്.
ഫ്രാന്‍സിന്റെ മതേതരമൂല്യങ്ങള്‍ സംരക്ഷിക്കുന്നതിന്റെ ഭാഗമായാണ് ഈ പദ്ധതികള്‍ എന്നാണ് മക്രോണിന്റെ വാദം. പുതിയ പദ്ധതി പ്രകാരം ഫ്രാന്‍സിലെ വിദ്യാഭ്യാസ സമ്പ്രദായത്തില്‍ നിന്നും മതത്തെ പൂര്‍ണമായും ഒഴിവാക്കുന്നുണ്ട്.
ആളുകള്‍ തെരഞ്ഞെടുക്കുന്ന മതത്തില്‍ വിശ്വാസിക്കാനുള്ള എല്ലാ അവകാശങ്ങളും ഫ്രാന്‍സിലുണ്ട്. എന്നാല്‍ സ്‌കൂളുകളിലും പൊതുഭരണവുമായി ബന്ധപ്പെട്ട ഇടങ്ങളിലും മതത്തിന്റെ ഇടപെടല്‍ ഉണ്ടാകുന്നത് മാത്രമാണ് നിരോധിക്കുക എന്നും മക്രോണ്‍ വ്യക്തമാക്കി.
ചര്‍ച്ചുകളെ രാജ്യത്തെ ഭരണ നിര്‍വഹണ സംവിധാനത്തില്‍ നിന്നും പൂര്‍ണമായും ഒഴിവാക്കുന്ന 1905 ല്‍ നടപ്പാക്കിയ നിയമം വീണ്ടും ശക്തിപ്പെടുത്തുന്നതിന്റെ ഭാഗമായാണ് പുതിയ പദ്ധതികള്‍.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
Content Highlight: Erdogan critisise Macron’s comment on Islam