തൃശൂര്‍: സംസ്ഥാനത്ത് മദ്യശാല ജീവനക്കാര്‍ക്ക് അതിക്രമം നടക്കുന്നത് തുടര്‍ക്കഥയെന്ന് എംപ്ലോയീസ് അസോസിയേഷന്‍ പ്രതിനിധികള്‍. സംസ്ഥാനത്ത് മദ്യശാല ജീവനക്കാര്‍ക്ക് നേരെയുള്ള അതിക്രമങ്ങള്‍ ഒറ്റപ്പെട്ട സംഭവമല്ലെന്ന് ഐ.എന്‍.ടി.യു.സി വിഭാഗം ബെവ്‌കോ എംപ്ലോയീസ് അസോയിയേഷന്‍ പ്രസിഡന്റ് എ. ജേക്കബ് പറഞ്ഞു. അതിക്രമങ്ങളുടെ പശ്ചാത്തലത്തില്‍ ജീവനക്കാരുടെ സുരക്ഷയുടെ കാര്യത്തില്‍ സര്‍ക്കാര്‍ ഇടപെടണമെന്നും അദ്ദേഹം ആവശ്യപ്പെട്ടു. മനോരമ ന്യൂസിനോടായിരുന്നു അദ്ദേഹത്തിന്റെ പ്രതികരണം.
‘ബിവറേജ് കോര്‍പ്പറേഷനിലെ ജീവനക്കാര്‍ക്ക് നേരെയുള്ള അതിക്രമങ്ങള്‍ വര്‍ധിച്ചുവരികയാണ്. ഇതൊന്നും ഒറ്റപ്പെട്ട സംഭവമല്ല. വനിതകള്‍ അടക്കമുള്ള ജീവനക്കാര്‍ അക്രമിക്കപ്പെടുന്ന സ്ഥിതിവിശേഷമാണുള്ളത്. മയക്കുമരുന്ന് ഉള്‍പ്പെടെയുള്ള മറ്റ് ലഹരികള്‍ ഉപയോഗിച്ചാണ് ഇവര്‍ വരുന്നത്. ജീവനക്കാരുടെ സുരക്ഷ ഉറപ്പുവരുത്താന്‍ സര്‍ക്കാര്‍ ഇടപെടണം,’ എ. ജേക്കബ് പറഞ്ഞു
തൃശൂരില്‍ മദ്യം കിട്ടാത്തതിന് തോക്ക് ചൂണ്ടി ഭീഷണിപ്പെടുത്തിയ നാലംഗ സംഘം ഇന്ന് പിടിയിലായിട്ടുണ്ട്. തൃശൂര്‍ പൂത്തോളിലെ കണ്‍സ്യൂമര്‍ ഫെഡിന്റെ മദ്യശാലയില്‍ വെള്ളിയാഴ്ച രാത്രി ഒമ്പത് മണിയോടെയാണ് കേസിനാസ്പദമായ സംഭവം നടന്നത്.
