സൗബിന്‍ ഷാഹിര്‍ നായകനാവുന്ന ഇലവീഴാപൂഞ്ചിറയുടെ ട്രെയ്ലര്‍ റിലീസ് ചെയ്തു. നേരത്തെ പുറത്തുവന്ന ചിത്രത്തിന്റെ പോസ്റ്ററുകള്‍ ശ്രദ്ധ നേടിയിരുന്നു. ആകാംക്ഷയുണര്‍തുന്നത്താണ് ചിത്രത്തിന്റെ ട്രെയ്ലര്‍.
സരിഗമ മലയാളം എന്ന യൂടൂബ് ചാനലിലാണ് ട്രെയ്ലര്‍ റിലീസ് ചെയ്തിരിക്കുന്നത്. മികച്ച പ്രതികരണമാണ് ട്രെയ്ലറിന് ലഭിച്ചുകൊണ്ടിരിക്കുന്നത്.
അതേസമയം അടുത്തിടെ സൗബിന്‍ പ്രധാന വേഷങ്ങള്‍ കൈകാര്യം ചെയ്ത സി.ബി.ഐ 5ലെയും, ജാക്ക്&ജില്ലിലെയും പ്രകടനത്തിന് വലിയ രീതിയിലുള്ള ട്രോളുകള്‍ താരം ഏറ്റുവാങ്ങിയിരുന്നു. എന്നാല്‍ ഈ വിമര്‍ശങ്ങള്‍ക്ക് എല്ലാം മറുപടിയാകും ഇലവീഴാപൂഞ്ചിറ എന്നാണ് ട്രെയ്ലര്‍ കണ്ടവര്‍ സോഷ്യല്‍ മീഡിയയില്‍ കുറിക്കുന്നത്.
ജോസഫ്, നായാട്ട് എന്നീ ചിത്രങ്ങളിലൂടെ ശ്രദ്ധ നേടിയ തിരക്കഥാകൃത്ത് ഷാഹി കബീര്‍ സംവിധായകനായി അരങ്ങേറുന്ന ചിത്രമാണ് ഇലവീഴാപൂഞ്ചിറ. സുധി കോപ്പ, ജൂഡ് ആന്തണി ജോസഫ് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
സമുദ്രനിരപ്പില്‍ നിന്നും മൂവായിരത്തിലധികം അടി ഉയരത്തില്‍ സ്ഥിതി ചെയ്യുന്ന ഇലവീഴാപൂഞ്ചിറ എന്ന വിനോദസഞ്ചാര മേഖലയിലാണ് സിനിമ ചിത്രീകരിച്ചിരിക്കുന്നത്. പൊലീസ് സ്റ്റോറിയാണ് ചിത്രം. മലയാളത്തില്‍ ആദ്യമായി ഡോള്‍ബി വിഷന്‍ 4 കെ.എച്ച്.ഡി.ആറില്‍ പുറത്തിറങ്ങുന്ന ചിത്രം എന്ന പ്രത്യേകതയും ഇലവീഴാപൂഞ്ചിറയ്ക്കുണ്ട്.
കപ്പേളയ്ക്ക് ശേഷം കഥാസ് അണ്‍ടോള്‍ഡിന്റെ ബാനറില്‍ വിഷ്ണു വേണു നിര്‍മിക്കുന്ന ചിത്രമാണിത്. നിധീഷും ഷാജി മാറാടും ചേര്‍ന്നാണ് തിരക്കഥ ഒരുക്കിയിരിക്കുന്നത്.
