ന്യൂദൽഹി: വിദേശ നേരിട്ടുള്ള നിക്ഷേപ (എഫ്.ഡി.ഐ ) ചട്ടങ്ങൾ ലംഘിച്ചുവെന്നാരോപിച്ച് ബി.ബി.സി വേൾഡ് സർവീസ് ഇന്ത്യയ്ക്ക് 3.44 കോടിയിലധികം രൂപ പിഴ ചുമത്തി എൻഫോഴ്‌സ്‌മെന്റ് ഡയറക്ടറേറ്റ്.
ബ്രിട്ടീഷ് ബ്രോഡ്കാസ്റ്ററിനെതിരെ ഫോറിൻ എക്സ്ചേഞ്ച് മാനേജ്മെന്റ് ആക്ട് (ഫെമ) പ്രകാരം ഉത്തരവ് പുറപ്പെടുവിച്ച ഫെഡറൽ അന്വേഷണ ഏജൻസി ബി.ബി.സിയുടെ മൂന്ന് ഡയറക്ടർമാർക്ക് 1.14 കോടിയിലധികം രൂപ പിഴയും ചുമത്തിയിട്ടുണ്ട്. 2023ല്‍ രജിസ്റ്റര്‍ ചെയ്ത കേസിലാണ് ഇ.ഡിയുടെ നടപടി.
2021 ഒക്ടോബര്‍ 15 മുതല്‍ ഓരോ ദിവസവും 5000 രൂപ എന്ന കണക്കിനാണ് ബി.ബി.സി. ഇന്ത്യയ്ക്ക് പിഴയിടുന്നതെന്നും ഇ.ഡി. അറിയിച്ചു. 3,44,48,850 രൂപയാണ് കൃത്യം പിഴത്തുകയെന്നും പേര് വെളിപ്പെടുത്താത്ത ഇ.ഡി. ഉദ്യോഗസ്ഥന്‍ പറഞ്ഞു.
‘1999 ലെ ഫെമ (ഫോറിൻ എക്സ്ചേഞ്ച് മാനേജ്മെന്റ് ആക്ട്) വ്യവസ്ഥകൾ ലംഘിച്ചതിന്, 15 /10 /2021ന് ശേഷമുള്ള ഓരോ ദിവസത്തിനും ₹ 5000 പിഴയോടൊപ്പം ബി.ബി.സി ഡബ്ല്യു.എസ് ഇന്ത്യയ്ക്ക് ₹ 3,44,48,850 പിഴ ചുമത്തിക്കൊണ്ട് വെള്ളിയാഴ്ച ഞങ്ങൾ ഒരു ഉത്തരവ് പുറപ്പെടുവിച്ചു,’ പേര് വെളിപ്പെടുത്താൻ ആഗ്രഹിക്കാത്ത ഉദ്യോഗസ്ഥൻ പറഞ്ഞു.
കൂടാതെ, ലംഘന കാലയളവിൽ കമ്പനി പ്രവർത്തനങ്ങൾക്ക് മേൽനോട്ടം വഹിച്ചതിന് ഡയറക്ടർമാരായ ഗൈൽസ് ആന്റണി ഹണ്ട്, ഇന്ദു ശേഖർ സിൻഹ, പോൾ മൈക്കൽ ഗിബ്ബൺസ് എന്നിവർക്ക് ഓരോരുത്തർക്കും ₹ 1,14,82,950 പിഴ ചുമത്തിയിട്ടുണ്ടെന്ന് ഉദ്യോഗസ്ഥൻ കൂട്ടിച്ചേർത്തു.
ബി.ബി.സി. ഇന്ത്യയ്ക്കെതിരെ ഫെമ നിയമപ്രകാരം 2023 ഏപ്രിലിലാണ് ഇ.ഡി. കേസെടുത്തത്. നികുതി വെട്ടിപ്പിനും വിദേശനാണയ വിനിമയ നിയന്ത്രണ ചട്ടം ലംഘിച്ചതിനുമായിരുന്നു കേസ്. ആ വർഷം ഫെബ്രുവരിയില്‍ ബി.ബി.സി. ഇന്ത്യയുടെ ദൽഹി , മുംബൈ ഓഫീസുകളില്‍ ആദായ നികുതി വകുപ്പ് പരിശോധന നടത്തിയിരുന്നു. ഇതിനുപിന്നാലെയാണ് ചാനലിനെതിരെ ഇ.ഡി കേസ് രജിസ്റ്റര്‍ ചെയ്തത്.
updating…
Content Highlight: ED slaps Rs 3.44 cr penalty on BBC WS India; fines 3 directors
