ന്യൂദല്‍ഹി: 2019ലെ ലോക്‌സഭാ തെരഞ്ഞെടുപ്പില്‍ കൂടുതല്‍ വി.വി.പാറ്റ് യന്ത്രങ്ങള്‍ കേടുവരാന്‍ സാധ്യതയുണ്ടെന്നും അതിനാല്‍ 10% വി.വി.പാറ്റ് യന്ത്രങ്ങള്‍ അധികം കരുതണമെന്നും തെരഞ്ഞെടുപ്പു കമ്മീഷന്റെ നിര്‍ദേശം. തെരഞ്ഞെടുപ്പു പാനലില്‍ നിന്നുള്ള ഒരു നോട്ടീസ് ഉദ്ധരിച്ചുകൊണ്ട് ഇന്ത്യന്‍ എക്‌സ്പ്രസാണ് ഇക്കാര്യം റിപ്പോര്‍ട്ടു ചെയ്തത്.
അടുത്തിടെ നടന്ന നിയമസഭാ തെരഞ്ഞെടുപ്പുകളില്‍ വോട്ടിങ് യന്ത്രങ്ങള്‍ കേടായ സംഭവങ്ങള്‍ വളരെയെധികം റിപ്പോര്‍ട്ടു ചെയ്തിരുന്നു. ഈ സാഹചര്യത്തിലാണ് തെരഞ്ഞെടുപ്പു കമ്മീഷന്‍ ഇത്തരമൊരു ഉത്തരവിട്ടിരിക്കുന്നത്.
Also Read:ബാണാസുരസാഗര്‍ ഡാം തുറന്നത് മുന്നറിയിപ്പില്ലാതെയെന്ന ആരോപണവുമായി വില്ലേജ് ഓഫീസര്‍
“മാനുഷികമായ ഇടപെടല്‍ കാരണം കൂടുതല്‍ വോട്ടിങ് യന്ത്രങ്ങള്‍ കേടാവാന്‍ സാധ്യതയുണ്ട്” എന്നു പറഞ്ഞാണ് തെരഞ്ഞെടുപ്പു കമ്മീഷന്‍ ഇത്തരമൊരു നിര്‍ദേശം പുറപ്പെടുവിച്ചിരിക്കുന്നത്.
“മികച്ച പരിശീലനത്തിലൂടെയും പദ്ധതികളിലൂടെയും വി.വി.പാറ്റ് തകരാറിലാവുന്ന സംഭവങ്ങള്‍ 1% മുതല്‍ 2% വരെ മാത്രം കുറയ്ക്കാന്‍ സാധിച്ചു” എന്നും നോട്ടീസില്‍ പറയുന്നു. “ഈ കുറവുണ്ടായിട്ടും വി.വിപാറ്റ് തകരാറിലാവുന്നതിന്റെ നിരക്ക് 8%- 9% ആയി മാറിയിരിക്കുകയാണ്.” എന്നും തെരഞ്ഞെടുപ്പു കമ്മീഷന്‍ പറയുന്നു.
ജൂണ്‍ 20ന് തെരഞ്ഞെടുപ്പു കമ്മീഷന്‍ 1.3ലക്ഷം വി.വി.പാറ്റുകള്‍ക്ക് ഓര്‍ഡര്‍ നല്‍കിയിരുന്നു. നേരത്തെ ഓര്‍ഡര്‍ ചെയ്ത 16.15ലക്ഷത്തിനു പുറമേയാണിത്. ഇതോടെ തെരഞ്ഞെടുപ്പു കമ്മീഷന്റെ വി.വിപാറ്റ് ശേഖരത്തില്‍ 25% മുതല്‍ 35% വരെ വര്‍ധനവുണ്ടാവും.
ആകെ 17.4 ലക്ഷം വി.വി.പാറ്റുകള്‍ക്കാണ് തെരഞ്ഞെടുപ്പു കമ്മീഷന്‍ ഉത്തരവിട്ടിരിക്കുന്നത്. ഒക്ടോബര്‍ 30നു മുമ്പ് ഇത് എത്തിക്കണമെന്നാണ് കമ്മീഷന്‍ നിര്‍ദേശിച്ചിരിക്കുന്നത്. 250.16 കോടി രൂപയോളമാണ് ഇതിനു ചിലവു പ്രതീക്ഷിക്കുന്നത്.
മെയ് 28ന് കൈരാന, ബണ്ഡാര-ഗോണ്ഡിയ ഉപതെരഞ്ഞെടുപ്പുകളില്‍ നിരവധിയിടങ്ങളില്‍ വി.വി.പാറ്റ് തകരാറുകള്‍ റിപ്പോര്‍ട്ടു ചെയ്തിരുന്നു. ബണ്ഡാര-ഗോണ്ഡിയയില്‍ 35 ബൂത്തുകളിലാണ് പോളിങ് നിര്‍ത്തിവെക്കേണ്ടി വന്നത്. കൈരാനയില്‍ 175 ബൂത്തുകളിലാണ് വി.വി.പാറ്റ് തകരാറ് റിപ്പോര്‍ട്ട് ചെയ്തതെന്നാണ് ലോക്ദള്‍ സ്ഥാനാര്‍ത്ഥിയായ തബസ്സും ഹസന്‍ തെരഞ്ഞെടുപ്പു പാനലിന് എഴുതിയ കത്തില്‍ പറയുന്നത്.