കുടുംബത്തിന്റെ ആവശ്യം സര്‍വകലാശാല അംഗീകരിച്ചു; ഡാനിഷ് സിദ്ദിഖിയുടെ മൃതദേഹം ജാമിഅ മില്ലിയയില്‍ ഖബറടക്കും

ന്യൂദല്‍ഹി: അഫ്ഗാനിസ്ഥാനില്‍ താലിബാന്‍ ആക്രമണത്തില്‍ കൊല്ലപ്പെട്ട റോയിട്ടേഴ്‌സ് ഫോട്ടോഗ്രഫര്‍ ഡാനിഷ് സിദ്ദിഖിയുടെ മൃതദേഹം ദല്‍ഹി ജാമിഅ മില്ലിയ സര്‍വകലാശാലയില്‍ ഖബറടക്കും. ഡാനിഷ് സിദ്ദിഖിയുടെ കുടുംബത്തിന്റെ ആവശ്യം സര്‍വകലാശാല അധികൃതര്‍ അംഗീകരിക്കുകയായിരുന്നു.

ജാമിഅ മില്ലിയ സര്‍വകലാശാലയില്‍ നിന്ന് സാമ്പത്തിക ശാസ്ത്രത്തില്‍ ബിരുദം നേടിയ ഡാനിഷ് ജാമിഅയില്‍ നിന്ന് തന്നെയാണ് മാധ്യമപഠനവും പൂര്‍ത്തിയാക്കിയത്. ജാമിഅ ക്യാമ്പസുമായി വലിയ ബന്ധം കാത്തു സൂക്ഷിച്ചയാളായിരുന്നു അദ്ദേഹം.

കഴിഞ്ഞ ദിവസം താലിബാന്‍ റെഡ്‌ക്രോസിന് കൈമാറിയ മൃതദേഹം ഇന്നലെ രാത്രിയോടെ കാബൂളിലെ ഇന്ത്യന്‍ എംബസിയില്‍ എത്തിച്ചിരുന്നു. ഇന്ന് വൈകീട്ട് ആറ് മണിയോടെ മൃതദേഹം എയര്‍ ഇന്ത്യ വിമാനത്തില്‍ ഇന്ത്യയിലെത്തിക്കുമെന്നാണ് വിദേശകാര്യ മന്ത്രാലയം അറിയിക്കുന്നത്.

താലിബാനും അഫ്ഗാന്‍ സേനയും തമ്മില്‍ കാണ്ഡഹാറിലുണ്ടായ വെടിവെപ്പിലാണ് സിദ്ദിഖി കൊല്ലപ്പെട്ടത്.
കഴിഞ്ഞയാഴ്ചയാണു കാണ്ഡഹാര്‍ താവളത്തില്‍നിന്നുള്ള അഫ്ഗാന്‍ സേനയ്‌ക്കൊപ്പം സംഘര്‍ഷം റിപ്പോര്‍ട്ട് ചെയ്യാനായി സിദ്ദിഖി യുദ്ധമുഖത്തേക്കു പോയത്.

കാണ്ഡഹാറില്‍ താലിബാന്‍ നടത്തുന്ന തുടര്‍ച്ചയായ ആക്രമണങ്ങളുടെ ചിത്രം പകര്‍ത്തുന്നതിനിടെയാണ് ഡാനിഷ് സിദ്ദിഖി കൊല്ലപ്പെടുന്നത്. ചൊവ്വാഴ്ചയായിരുന്നു അവസാനമായി മേഖലയില്‍നിന്ന് സിദ്ദിഖി ചിത്രം പകര്‍ത്തി പുറത്തുവിട്ടത്. കാണ്ഡഹാറിലെ താലിബാന്‍ ആക്രമണത്തിന്റെ വിഡിയോ ദൃശ്യങ്ങളും അദ്ദേഹം ട്വിറ്ററില്‍ പങ്കുവെച്ചിരുന്നു.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ 

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം

CONTENT HIGHLIGHTS:  Danish Siddiqui’s body to be buried at graveyard of Jamia Millia Islamia