കൊല്‍ക്കത്ത: ഐ ലീഗില്‍ ഈസ്റ്റ് ബംഗാളിനെതിരെ ഗോകുലം കേരള എഫ്.സിക്ക് തോല്‍വി. ഒന്നിനെതിരെ മൂന്ന് ഗോളിനാണ് ഈസ്റ്റ് ബംഗാള്‍ ഗോകുലത്തെ തകര്‍ത്തത്. സീസണില്‍ ഗോകുലത്തിന്റെ രണ്ടാം തോല്‍വിയാണിത്. ഇതോടെ ഏഴ് മത്സരങ്ങളില്‍ നിന്ന് ഒമ്പത് പോയന്റുമായി ഗോകുലം ഏഴാമതാണ്.
മത്സരത്തിന്റെ തുടക്കം മുതല്‍ തന്നെ മികച്ച നീക്കങ്ങള്‍ നടത്തിയ ഈസ്റ്റ് ബംഗാള്‍ നാലാം മിനിറ്റില്‍ ലക്ഷ്യം കണ്ടു. ബ്രാന്‍ഡോസാണ് ബംഗാളിനായി സ്‌കോര്‍ ചെയ്തത്. പത്തുമിനിറ്റിനകം മികച്ച മുന്നേറ്റത്തിലൂടെ മലയാളി താരം ജോബി ജസ്റ്റില്‍ ഈസ്റ്റിന്റെ ലീഡ് നില രണ്ടാക്കി. പലതവണ ഗോകുലം മികച്ച മുന്നേറ്റം നടത്തിയെങ്കിലും ബംഗാള്‍ പ്രതിരോധം മറികടക്കാന്‍ ആയില്ല.
ALSO READ: ഓസ്‌ട്രേലിയയില്‍ റെക്കോര്‍ഡിട്ട് വിരാട് കോഹ്‌ലി
ഈതിനിടെ സാബയെ ബംഗാള്‍ കീപ്പര്‍ ബോക്‌സിനകത്ത് ഫൗള്‍ ചെയ്തതിന് റഫറി പെനല്‍റ്റി നിഷേധിക്കുകയായിരുന്നു. എന്നാല്‍ മിനിറ്റുകള്‍ക്കകം ഡാനിയല്‍ എഡോയുടെ ലോങ് പാസ് സ്വീകരിച്ച ക്രിസ്റ്റ്യന്‍ സാബ ഗോകുലത്തിനായി സ്‌കോര്‍ ചെയ്തു.
സമനില ഗോളിനായുള്ള ഗോകുലത്തിന്റെ ശ്രമത്തിനിടെ ഈസ്റ്റ് മൂന്നാമതും സ്‌കോര്‍ ചെയ്തു. 82-ാം മിനിറ്റില്‍ ക്യാപ്റ്റന്‍ മുഡേയുടെ പിഴവില്‍ നിന്നാണ് ലാല്‍റാം സ്‌കോര്‍ ചെയ്തത്.