ന്യൂദല്‍ഹി: ഇന്ന് (തിങ്കളാഴ്ച) പുലര്‍ച്ചെ 5.30ന് ദല്‍ഹിയില്‍ ഭൂചലനം ഉണ്ടായി. റിക്ടര്‍ സ്‌കെയിലില്‍ 4.0 തീവ്രത രേഖപ്പെടുത്തിയ ഭൂചലനമാണ് ഉണ്ടായത്. നിലവില്‍ അത്യാഹിതങ്ങളൊന്നും റിപ്പോര്‍ട്ട് ചെയ്തിട്ടില്ല.
ദല്‍ഹിയിലുള്‍പ്പെടെ ഉത്തരേന്ത്യയിലാകെ ഭൂചലനത്തിന്റെ പ്രകമ്പനങ്ങള്‍ അനുഭവപ്പെട്ടതായും ശക്തമായ പ്രകമ്പനമാണ് ദല്‍ഹിയില്‍ അനുഭവപ്പെട്ടതെന്നുമാണ് റിപ്പോര്‍ട്ടുകള്‍.
തെക്കന്‍ ദല്‍ഹിയിലെ ധൗള കുവാന്‍ മേഖലയിലെ ദുര്‍ഗാഭായ് ദേശ്മുഖ് കോളേജ് ഓഫ് സ്‌പെഷ്യല്‍ എഡ്യൂക്കേഷന് സമീപമാണ് ഭൂചലനത്തിന്റെ പ്രഭവകേന്ദ്രമെന്ന് ഉദ്യോഗസ്ഥന്‍ പറഞ്ഞതായി പി.ടി.ഐ റിപ്പോര്‍ട്ട് ചെയ്തു.
നാഷണല്‍ സെന്റര്‍ ഫോര്‍ സീസ്‌മോളജിയുടെ എക്‌സ് പോസ്റ്റ് പ്രകാരം 5.36ന് അഞ്ച് കിലോമീറ്റര്‍ താഴ്ചയില്‍ ഭൂകമ്പം ഉണ്ടായതായി പറയുന്നു.
അതേസമയം ഏതാനും സെക്കന്റുകള്‍ നീണ്ടുനിന്ന ഭൂചലനം ജനവാസ മേഖലകളില്‍ അനുഭവപ്പെട്ടതായും ജനങ്ങള്‍ പരിഭ്രാന്തരായതായും റിപ്പോര്‍ട്ടുകളുണ്ട്. നാശനഷ്ടങ്ങളോ ആളപായമോ ഇതുവരെ സ്ഥിരീകരിച്ചിട്ടില്ല.
ജനങ്ങള്‍ ശാന്തരായിരിക്കമമെന്നും തുടര്‍ചലനങ്ങള്‍ ഉണ്ടാവാന്‍ സാധ്യതയുള്ളതിനാല്‍ ജാഗ്രത പാലിക്കണമെന്നും പ്രധാനമന്ത്രി നരേന്ദ്രമോദി അറിയിച്ചു. സുരക്ഷാ മുന്‍കരുതലുകള്‍ പാലിക്കണ്ടേതുണ്ടെന്നും സ്ഥിതിഗതികള്‍ നിരീക്ഷിച്ചുവരികയാണെന്നും പ്രധാനമന്ത്രി എക്‌സില്‍ കുറിച്ചു.
Content Highlight: Earthquake in Delhi; It registered 4.0 on the Richter scale