'സാധാരണ യാത്രക്കാരെ കൊള്ളയടിക്കുകയാണ് റെയില്‍വേ കാറ്ററിങ് ആന്‍ഡ് ടൂറിസം കോര്‍പ്പറേഷന്‍'
ഡൂള്‍ന്യൂസ് ഡെസ്‌ക്
Monday, 27th February 2023, 10:13 pm
തിരുവനന്തപുരം: റെയല്‍വേ സ്റ്റേഷനുകളിലെ ഭക്ഷണ ശാലകളില്‍ വില വര്‍ധിപ്പിച്ച നടപടിയില്‍ പ്രതിഷേധവുമായി ഡി.വൈ.എഫ്.ഐ. ജനങ്ങളെ ദ്രോഹിക്കുന്ന ഈ വില വര്‍ധനവ് അടിയന്തിരമായി പിന്‍വലിക്കണമെന്നും ഇതിനെതിരായി പ്രതിഷേധങ്ങള്‍ ഉയര്‍ന്നു വരണമെന്നും ഡി.വൈ.എഫ്.ഐ സംസ്ഥാന സെക്രട്ടറിയേറ്റ് പ്രസ്താവനയിലൂടെ ആവശ്യപ്പെട്ടു.
റെയില്‍വേയെ ആശ്രയിച്ച് യാത്ര ചെയ്യുന്ന സാധാരണ ജനതയെ ദുരിതത്തിലാഴ്ത്തുന്ന നടപടി ന്യായീകരിക്കാന്‍ കഴിയാത്തതാണെന്നും ഡി.വൈ.എഫ്.ഐ പറഞ്ഞു.
‘പൊതുഗതാഗതത്തിന് വേണ്ടി സാധാരണ ജനങ്ങള്‍ ആശ്രയിക്കുന്ന റെയില്‍വേ സ്റ്റേഷനുകളിലെ ഭക്ഷണശാലകളില്‍ വിഭവങ്ങളുടെ വില അതിഭീമമായ രീതിയില്‍ വര്‍ധിപ്പിച്ചിരിക്കുകയാണ്. പല വിഭവങ്ങള്‍ക്കും രണ്ടിരട്ടി വര്‍ധനവ് പോലും ഉണ്ടായിരിക്കുന്നു. പഴം പൊരിയുടെ വില 13ല്‍ നിന്ന് 20 രൂപയായും ഊണിന് 55ല്‍ നിന്ന് 95 രൂപയായും വര്‍ധിച്ചു.
