ഷാരൂഖ് ഖാനും രാജ്കുമാര്‍ ഹിരാനിയും ആദ്യമായി ഒന്നിച്ച ഡങ്കിയുടെ ആദ്യദിന കളക്ഷന്‍ പുറത്ത്. 50 കോടിയാണ് ആദ്യദിനത്തില്‍ ഡങ്കി ബോക്‌സ് ഓഫീസില്‍ നിന്നും നേടിയിരിക്കുന്നത്. നിര്‍മാണ കമ്പനിയായ റെഡ് ചില്ലീസ് തന്നെയാണ് ഇക്കാര്യം പുറത്ത് വിട്ടിരിക്കുന്നത്. ഡിസംബര്‍ 21നാണ് ചിത്രം റിലീസ് ചെയ്തത്. കോടി ക്ലബ്ബില്‍ ഇടംപിടിച്ചെങ്കില്‍ ഈ വര്‍ഷം പുറത്തിറങ്ങിയ ഷാരൂഖിന്റെ മുന്‍ചിത്രങ്ങളെ അപേക്ഷിച്ച് ഡങ്കിക്ക് കളക്ഷന്‍ കുറവാണ്. ആദ്യ ദിനത്തില്‍ പത്താന്‍ 57 കോടിയും ജവാന്‍ 89.5 കോടിയും നേടിയിരുന്നു.
ഡങ്കിയോടെ 1000 കോടി ക്ലബ്ബില്‍ ഒരേ വര്‍ഷം ഷാരൂഖ് ഹാട്രിക് അടിക്കുമെന്നായിരുന്നു ആരാധകരുടെ പ്രതീക്ഷ. പത്താനും ജവാനും 1000 കോടി നേടിയിരുന്നു. സമ്മിശ്ര പ്രതികരണമാണ് ഡങ്കിക്ക് ലഭിച്ചുകൊണ്ടിരിക്കുന്നത്. വരും ദിനങ്ങളിലെ പ്രശാന്ത നീല്‍- പ്രഭാസ് ചിത്രം സലാറിന്റെ പ്രകടനം ഡങ്കിയെ ബാധിക്കുമോ എന്ന ആശങ്കയുമുണ്ട്.
രാജ്കുമാര്‍ ഹിരാനി തന്നെയാണ് ഡങ്കിയുടെ തിരക്കഥയും ചിത്രസംയോജനവും നിര്‍വഹിച്ചിരിക്കുന്നത്. രാജ്കുമാര്‍ ഹിറാനിയോടൊപ്പം അഭിജാത് ജോഷി, കനിക ധില്ലന്‍ എന്നിവരും ചേര്‍ന്നാണ് ചിത്രത്തിന്റെ തിരക്കഥ തയ്യാറാക്കിയിരിക്കുന്നത്. റെഡ് ചില്ലീസ് എന്റര്‍ടെയ്ന്‍മെന്റും ജിയോ സ്റ്റുഡിയോസും ചേര്‍ന്നാണ് ഡങ്കി നിര്‍മിച്ചിരിക്കുന്നത്. ഷാരൂഖ് ഖാന്‍ നായകനായെത്തിയ ജവാന്‍ കേരളത്തിലും തമിഴകത്തും വിതരണത്തിനെത്തിച്ചത് ശ്രീ ഗോകുലം മൂവീസ് ആണ്.
ബൊമാന്‍ ഇറാനി, തപ്സി പന്നു, വിക്കി കൗശല്‍, വിക്രം കൊച്ചാര്‍, അനില്‍ ഗ്രോവര്‍ എന്നിവരാണ് ഡങ്കിയില്‍ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. മുംബൈ, ജബല്‍പൂര്‍, കശ്മീര്‍, ബുഡാപെസ്റ്റ്, ലണ്ടന്‍, ജിദ്ദ, നിയോം എന്നിവിടങ്ങളിലായി ചിത്രീകരിച്ച ഡങ്കിക്ക് അമന്‍ പന്താണ് പശ്ചാത്തലസംഗീതം പകര്‍ന്നത്. പ്രീതം സൗണ്ട് ട്രാക്ക് ഒരുക്കി. സി.കെ. മുരളീധരന്‍, മനുഷ് നന്ദന്‍, അമിത് റോയ് എന്നിവരാണ് ചിത്രത്തിന്റെ ഛായാഗ്രാഹകര്‍.
Content Highlight: Dunki movie first day collection