പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന ചിത്രമാണ് ലക്കി ഭാസ്‌കര്‍. ഒരു വര്‍ഷത്തെ ഇടവേളക്ക് ശേഷം ദുല്‍ഖര്‍ നായകനായെത്തുന്ന ചിത്രമെന്ന നിലയില്‍ വന്‍ പ്രതീക്ഷയാണ് ആരാധകര്‍ ലക്കി ഭാസ്‌കറിന് മേല്‍ വെക്കുന്നത്. 1980കളില്‍ മുംബൈയില്‍ നടക്കുന്ന കഥയാണ് ചിത്രത്തിന്റേത്. കേരളത്തിന് പുറത്ത് ചിത്രത്തിന് വന്‍ വരവേല്പാണ് ഒരുങ്ങുന്നത്. തെലുങ്കില്‍ ഒരുക്കിയ ലക്കി ഭാസ്‌കര്‍ തമിഴ്, മലയാളം, കന്നഡ, ഹിന്ദി ഭാഷകളില്‍ തിയേറ്ററുകളിലെത്തും.

കഴിഞ്ഞ ദിവസം ഹൈദരബാദില്‍ ചിത്രത്തിന്റെ സ്‌പെഷ്യല്‍ പ്രീമിയര്‍ നടന്നിരുന്നു. തെലുങ്കിലെ വന്‍ താരങ്ങളും സംവിധായകരും ചടങ്ങില്‍ പങ്കെടുത്തിരുന്നു. ചിത്രം കണ്ട ശേഷം തനിക്ക് ഏറ്റവും ഇഷ്ടപ്പെട്ട പെര്‍ഫോമറെപ്പറ്റി സംസാരിക്കുകയാണ് ദുല്‍ഖര്‍. ചിത്രത്തില്‍ തന്റെ മകനായെത്തിയ ഋത്വിക്കിന്റെ പ്രകടനം തനിക്ക് വളരെയധികം ഇഷ്ടമായെന്ന് ദുല്‍ഖര്‍ പറഞ്ഞു. താന്‍ അവന്റെ വലിയ ഫാനായി മാറിയെന്നും മറ്റുള്ളവരെക്കാള്‍ ഗംഭീര പെര്‍ഫോമന്‍സ് ഋത്വിക്കിന്റേതാണെന്നും ദുല്‍ഖര്‍ കൂട്ടിച്ചേര്‍ത്തു.

ഋത്വികുമായുള്ള തന്റെ കോമ്പിനേഷന്‍ സീനുകളില്‍ ഒരിക്കല്‍ പോലും റീടേക്ക് പോകേണ്ടി വന്നിട്ടില്ലെന്ന് ദുല്‍ഖര്‍ പറഞ്ഞു. ഒരിക്കല്‍ പഠിച്ച ഡയലോഗ് അവന് രണ്ടാമതൊന്ന് നോക്കേണ്ടി വന്നിട്ടില്ലെന്നും എല്ലായിടത്തും വളരെ കോണ്‍ഫിഡന്റായിട്ടാണ് അവന്‍ നില്‍ക്കാറുള്ളതെന്നും ദുല്‍ഖര്‍ കൂട്ടിച്ചേര്‍ത്തു. അവന് ഉള്ള അത്രയും കോണ്‍ഫിഡന്‍സും ടാലന്റും തനിക്കും കിട്ടിയിരുന്നെങ്കില്‍ എന്ന് താന്‍ ആഗ്രഹിക്കാറുണ്ടെന്നും ദുല്‍ഖര്‍ സല്‍മാന്‍ പറഞ്ഞു.

‘ഋത്വിക്.. ഞാന്‍ നിന്റെ വലിയൊരു ഫാനായി മാറിയിരിക്കുകയാണ്. എന്റെ അഭിപ്രയത്തില്‍ ഈ സിനിമയിലെ ഏറ്റവും മികച്ച പെര്‍ഫോമര്‍ അവനാണ്. മറ്റുള്ളവരെക്കാള്‍ ഗംഭീര പെര്‍ഫോമന്‍സാണ് അവന്‍ കാഴ്ചവെച്ചത്. ഒരിക്കല്‍ പോലും അവന് റീടേക്ക് പോകേണ്ടി വന്നിട്ടില്ല. ഒരു തവണ ഡയലോഗ് പഠിച്ച ശേഷം അത് വീണ്ടും നോക്കേണ്ട ആവശ്യം അവന് ഉണ്ടായിട്ടില്ല.

ഈ സ്‌റ്റേജില്‍ പോലും അവന്‍ എത്രമാത്ര കോണ്‍ഫിഡന്‍സിലാണ് നിന്നതെന്ന് എല്ലാവരും കണ്ടതാണല്ലോ. അവന് കിട്ടിയതുപോലുള്ള കോണ്‍ഫിഡന്‍സും ടാലന്റും എനിക്കും കിട്ടിയിരുന്നെങ്കില്‍ എന്ന് പലപ്പോഴും ആഗ്രഹിച്ചിട്ടുണ്ട്,’ ദുല്‍ഖര്‍ സല്‍മാന്‍ പറഞ്ഞു.

കഴിഞ്ഞ വര്‍ഷത്തെ ഏറ്റവും വലിയ ഹിറ്റുകളിലൊന്നായ ജയിലറിലും ഋത്വിക് ഭാഗമായിരുന്നു. രജിനിയുടെ കൊച്ചുമകനായിട്ടാണ് ഋത്വിക് ജയിലറില്‍ വേഷമിട്ടത്. പലരും ഋത്വികിന്റെ പ്രകടനത്തെ ആ സമയത്ത് അഭിനന്ദിച്ച് രംഗത്തെത്തിയിരുന്നു.

Content Highlight: Dulquer Salman saying he became fan of Master Rithwik after watched Lucky Bhaskar