ഈ വര്‍ഷം കണ്ടതില്‍ തനിക്ക് ഇഷ്ടപ്പെട്ട ചിത്രങ്ങളെ പറ്റി പറയുകയാണ് ദുല്‍ഖര്‍ സല്‍മാന്‍. മൂന്ന് ചിത്രങ്ങളുടെ പേര് പറഞ്ഞ താരം കുഞ്ചാക്കോ ബോബന്റെ ന്നാ താന്‍ കേസ് കൊടാണ് ആദ്യം തെരഞ്ഞെടുത്തത്. ഫിലിം കമ്പാനിയന്‍ നടത്തിയ ആക്ടേഴ്‌സ് ആഡയില്‍ ഈ വര്‍ഷം കണ്ടിട്ട് അസൂയ തോന്നിയ ഒരു സിനിമ ഏതാണെന്ന അവതാരകയുടെ ചോദ്യത്തിന് ഉത്തരം നല്‍കുകയായിരുന്നു അദ്ദേഹം.
റിഷഭ് ഷെട്ടി, അനില്‍ കപൂര്‍, വിദ്യാ ബാലന്‍, ജാന്‍വി കപൂര്‍, ആയുഷ്മാന്‍ ഖുറാന, വിജയ് വര്‍മ, ഷീബ ചദ്ദ തുടങ്ങിയവരും ആക്ടേഴ്‌സ് ആഡയില്‍ പങ്കെടുത്തിരുന്നു.
‘വീട്ടില്‍ പോകുമ്പോഴെല്ലാം കുടുംബത്തോടൊപ്പമിരുന്ന് മലയാളം സിനിമകള്‍ കാണാറുണ്ട്. ഒരുപാട് നല്ല സിനിമകള്‍ അപ്പോള്‍ കാണും. കുഞ്ചാക്കോ ബോബന്റെ ന്നാ താന്‍ കേസ് കൊട് വീണ്ടും വീണ്ടും കണ്ടിരുന്നു,’ ദുല്‍ഖര്‍ പറയുന്നതിനിടയില്‍ ‘ന്നാ താന്‍ കേസ് കൊട് അല്ലേ, ഞാനും കണ്ടിരുന്നു, മനോഹരമായ സിനിമ,’ എന്നാണ് റിഷഭ് ഷെട്ടി പറഞ്ഞത്.
‘വടക്കന്‍ കേരളത്തില്‍ നടക്കുന്ന കഥയാണ്. അവിടുത്തെ ഒരു ചെറിയ ടൗണില്‍ നടക്കുന്ന കോര്‍ട്ട് റൂം ഡ്രാമയാണ്. വാപ്പച്ചി ചെയ്ത റോഷാക്കും എനിക്ക് ഇഷ്ടപ്പെട്ടു. ടൊവിനോയുടെ തല്ലുമാലയും വളരെയധികം ഇഷ്ടപ്പെട്ടു,’ ദുല്‍ഖര്‍ കൂട്ടിച്ചേര്‍ത്തു.
കുഞ്ചാക്കോ ബോബനെ നായകനാക്കി രതീഷ് ബാലകൃഷ്ണ പൊതുവാള്‍ സംവിധാനം ചെയ്ത ചിത്രമാണ് ന്നാ താന്‍ കേസ് കൊട്. ആന്‍ഡ്രോയ്ഡ് കുഞ്ഞപ്പന്‍, കനകം കാമിനി കലഹം എന്നീ ചിത്രങ്ങള്‍ക്കു ശേഷം രതീഷ് പൊതുവാള്‍ തിരക്കഥയെഴുതി സംവിധാനം ചെയ്ത ചിത്രമാണിത്. ഗായത്രി ശങ്കറാണ് ചിത്രത്തില്‍ നായികയായത്.
ഫോബ്സ് മാസികയുടെ 2022ലെ മികച്ച ചിത്രങ്ങളുടെ പട്ടികയില്‍ ന്നാ താന്‍ കേസ് കൊട് മലയാളത്തില്‍ നിന്നും ഇടംപിടിച്ചിരുന്നു. റോഷാക്കാണ് പട്ടികയിലെത്തിയ മറ്റൊരു ചിത്രം.
Content Highlight: Dulquer Salmaan talks about his favorite films that he has seen this year