മലയാളത്തില്‍ അത്തരം ഡയലോഗുകള്‍ കുറവ്; അത് പറയാനുള്ള അനുവാദം ചില സൂപ്പര്‍സ്റ്റാറുകള്‍ക്ക് മാത്രം: ദുല്‍ഖര്‍ സല്‍മാന്‍
എന്റര്‍ടെയിന്‍മെന്റ് ഡെസ്‌ക്
Tuesday, 29th October 2024, 9:36 pm
മമ്മൂട്ടിയുടെ മകന്‍ എന്ന ടാഗ് ലൈനോടെ സിനിമയിലേക്ക് വന്ന താരമാണ് ദുല്‍ഖര്‍ സല്‍മാന്‍. എന്നാല്‍ സിനിമ മേഖലയില്‍ തന്റേതായ സ്ഥാനം നേടിയെടുക്കാന്‍ അദ്ദേഹത്തിന് അധികസമയം വേണ്ടി വന്നില്ല. മമ്മൂട്ടിയുടെ മകന്‍ എന്ന ലേബലില്‍ നിന്നും ഡി.ക്യു ആയി വളര്‍ന്ന ദുല്‍ഖര്‍ ഇന്ന് പാന്‍ ഇന്ത്യന്‍ സ്റ്റാറാണ്.
മലയാളത്തിന് പുറമെ ഹിന്ദി, തമിഴ്, തെലുങ്ക് തുടങ്ങിയ ഭാഷകളിലും നിറയെ ആരാധകരുള്ള നടനാണ് ഡി.ക്യു. മറ്റ് ഭാഷകളില്‍ ഡബ്ബ് ചെയ്യുമ്പോള്‍ തനിക്ക് പഞ്ച് ഡയലോഗുകള്‍ പറയാന്‍ ബുദ്ധിമുട്ടാണെന്ന് ദുല്‍ഖര്‍ സല്‍മാന്‍ പറയുന്നു. മറ്റ് ഭാഷകളെ അപേക്ഷിച്ച് മലയാളസിനിമകളില്‍ പഞ്ച് ഡയലോഗുകള്‍ കുറവാണെന്നും അദ്ദേഹം കൂട്ടിച്ചേര്‍ത്തു.
‘മറ്റ് ഭാഷകളില്‍ ഡബ്ബ് ചെയ്യുമ്പോള്‍ ചില സമയത്ത് പഞ്ച് ഡയലോഗുകള്‍ പറയാന്‍ എനിക്ക് ബുദ്ധിമുട്ടാണ്. നമ്മുടെ മലയാളം സിനിമകളില്‍ പൊതുവെ പഞ്ച് ഡയലോകുകളെല്ലാം കുറവാണ്. നമ്മള്‍ പഞ്ച് ഡയലോഗുകള്‍ പറയാന്‍ ഉള്ള അര്‍ഹതയും അതിന്റെ റൈറ്റ് കൊടുത്തിരിക്കുന്നതെല്ലാം ചുരുക്കം ചില സൂപ്പര്‍സ്റ്റാറുകള്‍ക്ക് മാത്രമാണ്.
ഒരു വര്‍ഷത്തെ ഇടവേളക്ക് ശേഷം തിയേറ്ററുകളിലെത്തുന്ന ദുല്‍ഖര്‍ ചിത്രമാണ് ലക്കി ഭാസ്‌കര്‍. വെങ്കി അട്‌ലൂരി സംവിധാനം ചെയ്യുന്ന ചിത്രം തെലുങ്കിലാണ് ഒരുങ്ങിയത്. തമിഴ്, മലയാളം, കന്നഡ, ഹിന്ദി ഭാഷകളില്‍ ചിത്രം 31ന്‌ തിയേറ്ററുകളിലെത്തും.