മലയാളത്തിലെ യുവനടന്മാരില്‍ ഏറ്റവുമധികം ഫാന്‍ ഫോളോയിങ്ങുള്ള നടനാണ് ദുല്‍ഖര്‍ സല്‍മാന്‍. മമ്മൂട്ടി, മോഹന്‍ലാല്‍ എന്നിവര്‍ക്ക് ശേഷം ഏത് സിനിമക്കും ബോക്സ് ഓഫീസില്‍ ചലനമുണ്ടാക്കാന്‍ ദുല്‍ഖറിന്റെ സിനിമകള്‍ക്കാണ് സാധിച്ചിട്ടുള്ളത്. മലയാളത്തിന് പുറമെ തമിഴ്, തെലുങ്ക്, ഹിന്ദി ഭാഷകളില്‍ സാന്നിധ്യമറിയിച്ച ദുല്‍ഖറിന്റെ ഏറ്റവും പുതിയ ചിത്രമായ ലക്കി ഭാസ്‌കര്‍ മികച്ച പ്രതികരണം നേടി മുന്നേറുകയാണ്.
തെലുങ്കില്‍ ഒരുങ്ങിയ ചിത്രം മലയാളം, തമിഴ്, കന്നഡ, ഹിന്ദി ഭാഷകളില്‍ പ്രദര്‍ശനത്തിനെത്തിയിട്ടുണ്ട്. കരിയര്‍ ആരംഭിച്ച് 13ാം വര്‍ഷത്തിലേക്ക് കടക്കുമ്പോള്‍ 40ലധികം സിനിമകള്‍ ചെയ്തുവെന്നും എന്നാല്‍ ഇതുവരെ ഒരു ചിത്രം പോലും 100 കോടി നേടിയിട്ടില്ലെന്നും ദുല്‍ഖര്‍ പറഞ്ഞു.
ചിത്രം 100 കോടി നേടുമോ എന്ന റാണയുടെ ചോദ്യത്തിന് മറുപടി നല്‍കുകയായിരുന്നു ദുല്‍ഖര്‍. ചിത്രത്തിന്റെ നിര്‍മാതാവ് ആദ്യദിനം തന്നെ 100 കോടി നേടിയ ഗുണ്ടൂര്‍ കാരം എടുത്തയാളാണെന്നും ലക്കി ഭാസ്‌കര്‍ എന്ന ചിത്രത്തിലൂടെ കരിയറില്‍ ആദ്യമായി 100 കോടി നേടാനാകുമെന്നും ദുല്‍ഖര്‍ കൂട്ടിച്ചേര്‍ത്തു. ഏതൊരു നടനെയും പോലെ 100 കോടി ക്ലബ് എന്നത് തന്റെയും ആഗ്രഹമാണെന്ന് ദുല്‍ഖര്‍ പറഞ്ഞു.
ലക്കി ഭാസ്‌കര്‍ 100 കോടി നേടിയാല്‍ താന്‍ റാണയുടെ ഫോട്ടോ ഫ്രെയിം ചെയ്ത് വെക്കുമെന്നും ദുല്‍ഖര്‍ കൂട്ടിച്ചേര്‍ത്തു. ചിത്രത്തിന്റെ നിര്‍മാതാവായ വംശി വളരെയധികം സപ്പോര്‍ട്ടീവായിട്ടുള്ള ആളാണെന്നും കഥയിലൊന്നും കൈകടത്താറില്ലെന്നും ദുല്‍ഖര്‍ പറഞ്ഞു. അദ്ദേഹത്തെപ്പോലൊരു നിര്‍മാതാവിനോടൊപ്പം മുമ്പ് വര്‍ക്ക് ചെയ്തിട്ടില്ലെന്നും ദുല്‍ഖര്‍ പറഞ്ഞു. എന്നാല്‍ സെറ്റില്‍ എല്ലായ്‌പ്പോഴും അദ്ദേഹത്തിന്റെ സാന്നിധ്യമുണ്ടായിരുന്നെന്നും ദുല്‍ഖര്‍ കൂട്ടിച്ചേര്‍ത്തു.
‘സിനിമയിലെത്തിയിട്ട് 13 വര്‍ഷമായി. ഇതുവരെ 40ഓളം സിനിമകള്‍ ചെയ്തു. എന്നാല്‍ ഇതുവരെ ഒരൊറ്റ സിനിമ പോലും 100 കോടി നേടിയിട്ടില്ല. ഈ പടത്തിന്റെ പ്രൊഡ്യൂസറുടെ മുന്‍ ചിത്രം ഗുണ്ടൂര്‍ കാരം ഫസ്റ്റ് ഡേ തന്നെ 100 കോടി നേടിയിട്ടുണ്ട്. ഈ സിനിമയിലൂടെ കരിയറില്‍ ആദ്യമായി 100 കോടി ക്ലബ്ബില്‍ കയറാനായാല്‍ സന്തോഷം. ഏതൊരു നടനെയും പോലെ എനിക്കും ആഗ്രഹമുണ്ട്, എന്റെയൊരു സിനിമ 100 കോടി നേടണമെന്ന്.
ഈ പടം 100 കോടി അടിച്ചാല്‍ വംശിക്കും എനിക്കും സന്തോഷമാകും, അതോടൊപ്പം ഞാന്‍ റാണയുടെ ഫോട്ടോ ഫ്രെയിം ചെയ്തുവെക്കും. അതുമാത്രമല്ല, വംശി എന്ന പ്രൊഡ്യൂസര്‍ വളരെയധികം സപ്പോര്‍ട്ടീവാണ്. ഈ പടത്തിന്റെ ഷൂട്ട് 30% തീര്‍ന്നപ്പോള്‍ തന്നെ അദ്ദേഹത്തിന് ഫുള്‍ കോണ്‍ഫിഡന്‍സായി. വംശിയെപ്പോലൊരു നിര്‍മാതാവുമായി മുമ്പ് വര്‍ക്ക് ചെയ്തിട്ടില്ല. കഥയിലും ബാക്കി കാര്യത്തിലുമൊന്നും പുള്ളി കൈ കടത്താറില്ല. എന്നാല്‍ സെറ്റില്‍ എല്ലായ്‌പ്പോഴും വംശിയുടെ സാന്നിധ്യമുണ്ടായിരിക്കും,’ ദുല്‍ഖര്‍ പറയുന്നു.
Content Highlight: Dulquer Salmaan saying he wish that Lucky Bhaskar will be his first 100 crore movie