മമ്മൂട്ടിയെ വെച്ച് നിരവധി ഹിറ്റുകള്‍ സൃഷ്ടിച്ച ഐ.വി ശശി ചിത്രത്തില്‍ ഇനി മമ്മൂട്ടിയുടെ മകന്‍ ദുല്‍ഖര്‍ സല്‍മാന്‍ നായകാനാകുന്നു. ദുല്‍ഖറിനെ നായകനാക്കി പുതിയ ചിത്രം ഒരുക്കാനുള്ള തയ്യാറെടുപ്പിലാണ് സംവിധായകന്‍ എന്നാണ് അറിയുന്നത്.[]
മലയാളത്തിലും തമിഴിലും ഹിന്ദിയിലും വ്യക്തി മുദ്ര പതിപ്പിച്ച ഐ.വി ശശി വീണ്ടും മലയാളത്തില്‍ സജീവമാകാനുള്ള തയ്യാറെടുപ്പിലാണെന്നാണ് അറിയുന്നത്.
ദുല്‍ഖറിനെ നായകനാക്കിയുള്ള ചിത്രത്തിന്റെ പ്രാരംഭ ജോലികള്‍ നടക്കുന്നുവെന്നാണ് അറിയുന്നത്. ചിത്രത്തിനെ കുറിച്ചുള്ള കൂടുതല്‍ കാര്യങ്ങള്‍ പുറത്ത് വിടാന്‍ സംവിധായകന്‍ തയ്യാറായിട്ടില്ല.
നിത്യ മേനോന്‍ നായികയായ വെള്ളത്തൂവലാണ് മലയാളത്തില്‍ ഐ.വി ശശി സംവിധാനം ചെയ്ത അവസാന ചിത്രം. അതിന് മുമ്പ് മമ്മൂട്ടിയെയും ബോളിവുഡ് താരം കത്രീന കൈഫിനേയും ഒന്നിച്ചഭിനയിപ്പിച്ച ബല്‍റാംvsതാരാദാസ് വമ്പന്‍ പരാജയമായിരുന്നു.
മമ്മൂട്ടിയെ നായകനാക്കിയും പുതിയൊരു ചിത്രം സംവിധാനം ചെയ്യാനുള്ള ഒരുക്കത്തിലാണ് ഐ.വി ശശി. അന്തരിച്ച ടി. ദാമോദരന്‍ നേരത്തേ എഴുതിയ തിരക്കഥ സിനിമയാക്കാനുള്ള ഒരുക്കത്തിലാണ് സംവിധായകന്‍.