ഒരു ഓവറിലെ ആറ് പന്തിലും വിക്കറ്റ്, അതും എല്ലാം കുറ്റി തെറിച്ചത്; ആകെ വീഴ്ത്തിയത് പൂജ്യം റണ്ണിന് എട്ട് വിക്കറ്റ്; ഇത് ചരിത്രം
സ്പോര്‍ട്സ് ഡെസ്‌ക്
Saturday, 17th June 2023, 2:54 pm
ക്രിക്കറ്റ് ലോകത്തെ തന്നെ അമ്പരപ്പിച്ച സംഭവമായിരുന്നു കഴിഞ്ഞ ദിവസം നടന്നത്. ഒരു ഓവറിലെ ആറ് പന്തുകളിലും വിക്കറ്റ് നേടിയ കുട്ടിത്താരത്തിന്റെ പ്രകടനമാണ് ആരാധകരെ അമ്പരപ്പിച്ചിരിക്കുന്നത്.
വേര്‍സ്റ്റര്‍ഷെയര്‍ കൗണ്ടി ബോര്‍ഡ് മാച്ചിലാണ് ഒലി വൈറ്റ്ഹൗസ് എന്ന 12കാരന്‍ ഡബിള്‍ ഹാട്രിക് എന്ന അപൂര്‍വ റെക്കോഡ് തന്റെ പേരിലാക്കിയത്. ബ്രോംസ്‌ഗ്രോവ് ക്രിക്കറ്റ് ക്ലബ്ബും കുക്ഹില്‍ ക്രിക്കറ്റ് ക്ലബ്ബും തമ്മില്‍ നടന്ന മത്സരത്തിലായിരുന്നു ബ്രോംസ്‌ഗ്രോവ് ബൗളറുടെ പ്രകടനം.
ഒരു ഓവറിലെ ആറ് പന്തിലും വിക്കറ്റ് നേടിയ വൈറ്റ്ഹൗസ് താനെറിഞ്ഞ മറ്റൊരു ഓവറില്‍ രണ്ട് വിക്കറ്റും നേടിയിരുന്നു. രണ്ട് ഓവറില്‍ നിന്നും റണ്‍സൊന്നും വഴങ്ങാതെയാണ് കുട്ടിത്താരം എട്ട് വിക്കറ്റ് നേടിയത്.
