ന്യൂദല്‍ഹി: ലോക്‌സഭാ തെരഞ്ഞെടുപ്പിലെ മികച്ച വിജയത്തില്‍ പ്രധാനമന്ത്രി നരേന്ദ്രമോദിയെ അഭിനന്ദിച്ച് യു.എസ് പ്രസിഡന്റ് ഡൊണാള്‍ഡ് ട്രംപ്. ജി.20 ഉച്ചകോടിയ്ക്കിടെ ഇരുനേതാക്കളും തമ്മില്‍ ഉഭയകക്ഷി ചര്‍ച്ച നടത്തിയ വേളയിലാണ് ട്രംപിന്റെ അഭിനന്ദനം.
‘ നിങ്ങള്‍ ഈ വിജയം അര്‍ഹിക്കുന്നു. ഒരുമിച്ചു നിര്‍ത്താന്‍ നിങ്ങള്‍ ഏറെ കഠിനാധ്വാനം ചെയ്തിരിക്കുന്നു. നിങ്ങള്‍ ആദ്യം ചുമതലയേറ്റെടുത്ത സമയം ഞാനോര്‍ക്കുന്നു, അന്ന് പരസ്പരം കലഹിച്ചുകൊണ്ടിരിക്കുന്ന ഒരുപാട് വിഭാഗങ്ങളുണ്ടായിരുന്നു. ഇന്ന് നിങ്ങള്‍ എല്ലാവരേയും ഒരുമിച്ചു നിര്‍ത്തിയിരിക്കുന്നു.’ എന്ന് അഭിപ്രായപ്പെട്ടുകൊണ്ടാണ് ട്രംപിന്റെ അഭിനന്ദനം.
ഇറക്കുമതി തീരുവ, റഷ്യയുമായുള്ള ആയുധ കരാര്‍ തുടങ്ങിയ കാര്യങ്ങളില്‍ ഇന്ത്യയും യു.എസും തമ്മില്‍ അഭിപ്രായ ഭിന്നത നിലനില്‍ക്കുന്ന സമയത്താണ് ഇരുനേതാക്കളും തമ്മിലുളള കൂടിക്കാഴ്ച നടന്നിരിക്കുന്നത്.
