ലണ്ടന്‍: സെര്‍ബിയന്‍ താരം നൊവാക് ദ്യോക്കോവിച്ചിന് വിംബിള്‍ഡണ്‍. ദക്ഷിണാഫ്രിക്കയുടെ കെവിന്‍ ആന്‍ഡേഴ്‌സണെ നേരിട്ടുള്ള സെറ്റുകള്‍ക്കാണ് ദ്യോക്കോവിച്ച് പരാജയപ്പെടുത്തിയത്. സ്‌കോര്‍ 6-2, 6-3, 7-6(7-3).
ദ്യോക്കോവിച്ചിന്റെ 13ാം ഗ്രാന്‍ഡ്സ്ലാം കിരീടമാണിത്. സെമിയില്‍ നദാലിനെ തോല്‍പ്പിച്ചാണ് ദ്യോക്കോവിച്ച് കലാശപ്പോരിന് എത്തിയത്.
ആന്‍ഡേഴ്‌സണ്‍ മൂന്നാം സെറ്റില്‍ മികച്ച പ്രകടനമാണ് കാഴ്ചവെച്ചതെന്ന് മത്സരശേഷം ദ്യോക്കോവിച്ച് പറഞ്ഞു. ഈ മത്സരം അതിവൈകാരികത നിറഞ്ഞതായിരുന്നെന്നും മകന്‍ ഗാലറിയിലിരുന്ന് തന്റെ കളി കണ്ടതില്‍ സന്തോഷമുണ്ടെന്നും ദ്യോക്കോവിച്ച് പറഞ്ഞു.
അതേസമയം ഫൈനലില്‍ മികച്ച പ്രകടനം പുറത്തെടുക്കാനായില്ലെന്ന് ആന്‍ഡേഴ്‌സണ്‍ പറഞ്ഞു. ദ്യോക്കോവിച്ചിനെ അഭിനന്ദിക്കുന്നതായും ദക്ഷിണാഫ്രിക്കന്‍ താരം പറഞ്ഞു.
സെമിയില്‍ മാരത്താണ്‍ പോരാട്ടത്തിനൊടുവിലാണ് ആന്‍ഡേഴ്‌സണ്‍, ഐസ്‌നറെ തോല്‍പ്പിച്ചത്.