ജാതി വിവേചനത്തിനെതിരെ പ്രതിഷേധിക്കുന്ന ഗവേഷക വിദ്യാര്‍ഥിക്ക് പിന്തുണയുമായി ദിവ്യ ദ്വിവേദി

കോട്ടയം: എം.ജി സര്‍വകലാശാലയില്‍ ജാതി വിവേചനത്തിനെതിരെ പ്രതിഷേധിക്കുന്ന ദളിത് ഗവേഷക വിദ്യാര്‍ഥി ദീപാ പി. മോഹന് പിന്തുണയുമായി പ്രശസ്ത ചിന്തകയും ജാതി വിരുദ്ധ ആക്ടിവിസ്റ്റുമായ ദിവ്യ ദ്വിവേദി.

ദീപയ്ക്ക് എല്ലാ പിന്തുണകളും അര്‍പ്പിക്കുന്നതായും പോരാട്ടം ഉടന്‍ വിജയം കാണട്ടെയെന്നും ദിവ്യ ദ്വിവേദി അയച്ച സന്ദേശത്തില്‍ പറഞ്ഞു.

ദീപയുടെ വേദനയും ആശങ്കകളും ഉള്‍ക്കൊള്ളുന്നു. ഒരു മനുഷ്യനെന്ന നിലയില്‍ ജാതി വിവേചനത്തിനെതിരെ ദീപ പ്രചോദനാത്മകമായി പോരാടുകയാണെന്നും ദിവ്യ ദ്വിവേദി പറഞ്ഞു.

ഗവേഷണം പൂര്‍ത്തിയാക്കാനായി ദീപ നടത്തുന്ന പോരാട്ടം പ്രചോദിപ്പിക്കുന്നതാണെന്ന് ദിവ്യ ദ്വിവേദി സന്ദേശത്തില്‍ കൂട്ടിച്ചേര്‍ത്തു.

2011ലായിരുന്നു ദീപാ പി. മോഹന്‍ നാനോ സയന്‍സില്‍ എംഫിലിന് പ്രവേശം നേടിയത്. തുടര്‍ന്ന് 2014ല്‍ ഗവേഷണവും തുടങ്ങി. പക്ഷേ, ദളിത് വിദ്യാര്‍ത്ഥിയായ തനിക്ക് ഗവേഷണം പൂര്‍ത്തിയാക്കാനുള്ള യാതൊരു അവസരവും ലഭിക്കാത്തതിനെ തുടര്‍ന്ന് കഴിഞ്ഞ കുറച്ച് വര്‍ഷമായി എം.ജി സര്‍വകലാശാലയുടെ ജാതി വിവേചനത്തിനെതിരെ പോരാട്ടത്തിലാണ് ദീപ പി. മോഹനന്‍.

ജാതീയമായ വേര്‍തിരിവ് കാട്ടിയെന്ന് ആരോപിച്ച് ദീപ നല്‍കിയ പരാതിയില്‍ സിന്‍ഡിക്കേറ്റ് അന്വേഷണം നടത്തുകയും ആരോപണം ശരിയാണെന്ന് കണ്ടെത്തുകയും ചെയ്തിരുന്നു.

ദീപയ്ക്ക് അനുകൂലമായ കോടതി വിധികള്‍ക്കും അധികൃതര്‍ ചെവികൊടുത്തില്ല. ഒരുപാട് നിയമപോരാട്ടങ്ങള്‍ക്കൊടുവിലാണ് കോടതി വിധി നടപ്പാക്കണമെന്ന് ആവശ്യപ്പെട്ട് ദീപ സര്‍വകലാശാല കവാടത്തിന് മുന്നില്‍ നിരാഹാര സമരം തുടങ്ങിയിത്.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ 

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം

COMTENT HIGHLIGHTS: Divya Dwivedi, a well-known thinker and anti-caste activist supported Deepa P Mohan