ഇന്ത്യയിലെ ഏറ്റവും വലിയ ന്യൂനപക്ഷം ഭീഷണി നേരിടുന്നത് നിരാശാജനകമാണ്: മെഹബൂബ മുഫ്തി

ജമ്മു: ഉത്തർപ്രദേശിലെ സംഭാൽ മസ്ജിദിൻ്റെ പേരിൽ അടുത്തിടെ ആറ് സാധാരണക്കാർ കൊല്ലപ്പെട്ട സംഭവത്തിൽ മുൻ ജമ്മു കശ്മീർ മുഖ്യമന്ത്രിയും പീപ്പിൾസ് ഡെമോക്രാറ്റിക് പാർട്ടി (പി.ഡി.പി) പ്രസിഡൻ്റുമായ മെഹബൂബ മുഫ്തി ആശങ്ക രേഖപ്പെടുത്തി.

എല്ലാ പൗരന്മാർക്കും അവരുടെ പശ്ചാത്തലം പരിഗണിക്കാതെ തന്നെ തുല്യ അവകാശങ്ങൾ നൽകുന്ന ഭരണഘടനയുടെ ഉറപ്പിന് വിരുദ്ധമായി ആരാധനാലയങ്ങൾ ആക്രമിക്കപ്പെടുകയാണെന്ന് മെഹബൂബ മുഫ്തി കൂട്ടിച്ചേർത്തു.

‘നാം ഭരണഘടനാ ദിനം ആഘോഷിക്കുമ്പോൾ, നമ്മുടെ രാജ്യത്തെ ഏറ്റവും വലിയ ന്യൂനപക്ഷം ഭീഷണികൾ നേരിടുന്നത് നിരാശാജനകമാണ്. അവരുടെ അന്തസ്, ജീവിതം, ഉപജീവനമാർഗങ്ങൾ, ആരാധനാലയങ്ങൾ എന്നിവ ആക്രമിക്കപ്പെടുകയാണ്. വ്യക്തികളുടെ പശ്ചാത്തലം പരിഗണിക്കാതെ തന്നെ ഓരോ പൗരനും തുല്യ അവകാശങ്ങളും അന്തസ്സും ഭരണഘടന ഉറപ്പുനൽകുന്നുണ്ട്. എന്നാൽ ഇന്ത്യയിൽ നടക്കുന്ന സംഭവവികാസങ്ങൾ അതിന് വിരുദ്ധമാണ്,’ മുഫ്തി പറഞ്ഞു.

ഉത്തർപ്രദേശിലെ സംഭാലിൽ നടന്ന ആക്രമണത്തെക്കുറിച്ചും മുഫ്തി എക്‌സിൽ കുറിച്ചു.

‘ഉത്തർപ്രദേശിലെ സംഭാലിൽ ഈയിടെ നടന്ന അക്രമത്തിൽ ആറ് നിരപരാധികളുടെ ജീവൻ നഷ്ടപ്പെട്ടത് ഈ പരുഷമായ യാഥാർത്ഥ്യത്തിൻ്റെ വേദനാജനകമായ ഓർമ്മപ്പെടുത്തലാണ്. എല്ലാ ആരാധനാലയങ്ങളിലും 1947ൽ നിലനിന്നിരുന്ന തൽസ്ഥിതി തുടരണമെന്ന വ്യക്തമായ സുപ്രീം കോടതി വിധിയുണ്ടായിട്ടും മസ്ജിദുകൾക്ക് കീഴിലുള്ള ക്ഷേത്രങ്ങൾ തിരയുന്ന ഈ പ്രവണത തുടരുകയാണ്. ഭരണഘടനാ മൂല്യങ്ങളുടെയും നിയമവാഴ്ചയുടെയും ശോഷണം അങ്ങേയറ്റം ആശങ്കാജനകമാണ്.

ഇന്ത്യ എന്ന ആശയത്തിൽ വിശ്വസിക്കുന്ന നമ്മൾ ഈ മൂല്യങ്ങൾ സംരക്ഷിക്കാൻ ഉണർന്നില്ലെങ്കിൽ, നമ്മുടെ രാഷ്ട്രത്തിന് അതിൻ്റെ അതുല്യമായ സ്വത്വം നഷ്ടപ്പെടുകയും മറ്റ് പല രാജ്യങ്ങളിൽ നിന്നും വേർതിരിച്ചറിയാൻ കഴിയാതെ വരികയും ചെയ്യും,’ മുഫ്തി കുറിച്ചു.

അതേ സമയം സംഭാല്‍ ജില്ലയിലെ ഷാഹി മസ്ജിദിലെ സര്‍വേക്കിടെയുണ്ടായ വെടിവെപ്പില്‍ മരണപ്പെട്ടവരുടെ എണ്ണം ആറായി. വെടിയേറ്റ് ചികിത്സയിലായിരുന്ന യുവാവാണ് മരിച്ചത്.

ഉത്തര്‍പ്രദേശിലെ സംഭാല്‍ ജില്ലയിലെ ഷാഹി ജുമാ മസ്ജിദിലെ സര്‍വേ തടയുന്നതിനിടയിലുണ്ടായ പൊലീസ് വെടിവെപ്പില്‍ മൂന്ന് മുസ്‌ലിം യുവാക്കള്‍ സംഭവസ്ഥലത്തുതന്നെ കൊല്ലപ്പെട്ടിരുന്നു. ഇന്നലെ ചികിത്സയില്‍ കഴിയുകയായിരുന്ന മറ്റൊരു യുവാവായ മുഹമ്മദ് അയാന്‍ മരിച്ചിരുന്നു.

ഷാഹി ജുമാ മസ്ജിദില്‍ സര്‍വേക്കെതിരായുള്ള പ്രതിഷേധത്തിലിടയിലുണ്ടായ വെടിവെപ്പിലാണ് ആറ് പേര്‍ കൊല്ലപ്പെടുകയും നിരവധി പേര്‍ക്ക് പരിക്കേല്‍ക്കുകയും ചെയ്തത്. സുരക്ഷാ ഉദ്യോഗസ്ഥര്‍, അഡ്മിനിസ്ട്രേഷന്‍ ഉദ്യോഗസ്ഥര്‍ ഉള്‍പ്പെടെയുള്ളവര്‍ക്ക് പരിക്കേല്‍ക്കുകയും ചെയ്തിരുന്നു.

ഞായറാഴ്ചയാണ് ഉത്തര്‍പ്രദേശിലെ സംഭാലിലെ ഷാഹി മസ്ജിദില്‍ സര്‍വേക്കെത്തിയ ഉദ്യോഗസ്ഥരുമായ പ്രദേശവാസികള്‍ തര്‍ക്കത്തിലേര്‍പ്പെട്ടത്. ഈ സമയത്ത് സംഭവ സ്ഥലത്തുണ്ടായിരുന്ന പൊലീസ് പ്രതിഷേധക്കാര്‍ക്ക് നേരെ വെടിയുതിര്‍ക്കുകയായിരുന്നു.

Content Highlight: Disheartening to see country’s largest minority facing unprecedented threats: Mehbooba