ആ സിനിമകള്‍ വലിയ സ്‌ക്രീനില്‍ കാണുമ്പോള്‍ ഞാന്‍ അസ്വസ്ഥതനാകും; കാരണം... കമല്‍
എന്റര്‍ടെയിന്‍മെന്റ് ഡെസ്‌ക്
Friday, 19th January 2024, 12:02 pm
ഏതുതരം സിനിമയാണെങ്കിലും അത് അവതരിപ്പിക്കുന്ന രീതിയനുസരിച്ചാണ് അതിന്റെ തിയേറ്റര്‍ എക്‌സ്പീരിയന്‍സെന്ന് സംവിധായകന്‍ കമല്‍. മമ്മൂട്ടിയുടെ നന്‍പകല്‍ നേരത്ത് മയക്കം എന്ന ചിത്രം ഒരുപക്ഷേ തിയേറ്ററില്‍ കാണുമ്പോള്‍ ഉള്ള സുഖം ഒ.ടി.ടിയില്‍ കാണുമ്പോള്‍ കിട്ടില്ലെന്നും പല കൊച്ചു സിനിമകളും തിയേറ്ററില്‍ പോയി കാണുമ്പോള്‍ കിട്ടുന്ന ഫീല്‍ വേറെ എവിടെയും ലഭിക്കില്ലെന്നും അദ്ദേഹം പറഞ്ഞു.
താന്‍ സിനിമകള്‍ ഒ.ടി.ടിയിലും കാണാറുണ്ടെന്ന് പറയുന്ന കമല്‍ പല വലിയ സിനിമകളും അത്തരത്തില്‍ ഒ.ടി.ടിയിലാണ് കാണുന്നതെന്നും ശബ്ദം ഒരുപാട് കൂടികഴിഞ്ഞാല്‍ തനിക്ക് വലിയ അസ്വസ്ഥതയാണെന്നും കൂട്ടിച്ചേര്‍ത്തു.
ഫില്‍മിബീറ്റ് മലയാളത്തിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം. വലിയ സ്‌ക്രീനില്‍ വയലന്‍സ് കാണുമ്പോഴും താന്‍ അസ്വസ്ഥതനാകുമെന്ന് കമല്‍ പറയുന്നുണ്ട്.
