വനിത മാഗസിന്റെ കവര്‍ പേജില്‍ നടിയെ ആക്രമിച്ച കേസിലെ പ്രതിയായ നടന്‍ ദിലീപിന്റെ ചിത്രം വന്നത് വ്യാപകമായി വിമര്‍ശിക്കപ്പെടുന്നുണ്ട്. ഈ സഹാചര്യത്തില്‍ ദിലീപിന് പിന്തുണയുമായി എത്തിയിരിക്കുകയാണ് സംവിധായകന്‍ അരുണ്‍ ഗോപി.
അരുണ്‍ ഗോപിയുടെ ഫേസ്ബുക്ക് പേജില്‍ വനിതയുടെ കവര്‍ പേജ് പങ്കുവെച്ച് ‘ലൗവ് റിയാക്ഷന്‍’ നല്‍കിയാണ് അദ്ദേഹം പിന്തുണ അറിയിച്ചത്.
ആക്രമിക്കപ്പെട്ട പെണ്‍കുട്ടിക്ക് നീതി കിട്ടുക തന്നെ വേണം. അതിന് അതുചെയ്ത ആളിനെയാണ് കണ്ടെത്തേണ്ടത് എന്ന കമന്റും അരുണ്‍ ഗോപി പോസ്റ്റിന് താഴെ നല്‍കുന്നുണ്ട്.
അരുണ്‍ ഗോപിയുടെ പോസ്റ്റ് വന്നതിന് ശേഷം നിരവധി പേര് വിമര്‍ശനങ്ങളുമായി വരുന്നുണ്ട്. ദിലീപുമായുള്ള അരുണ്‍ ഗോപിയുടെ സൗഹൃദമാണ് ദിലീപിനെ വെള്ളപൂശാന്‍ അദ്ദേഹം ശ്രമിക്കുന്നതെന്നാണ് വിമര്‍ശകര്‍ പറയുന്നത്.
‘എന്റെ വളര്‍ച്ച അത് ഞാന്‍ നോക്കിക്കോളാം ആക്രമിക്കപ്പെട്ട പെണ്‍കുട്ടിക്ക് നീതികിട്ടുക തന്നെ വേണം. അതിന് അത് ചെയ്ത ആളിനെയാണ് കണ്ടെത്തേണ്ടത്.
കോടതി താങ്കളുടെ കണ്ടെത്തല്‍ അംഗീകരിക്കുമ്പോള്‍ ഞാന്‍ താങ്കള്‍ പറയുന്നതും അംഗീകരിക്കാം,’ എന്ന് തന്റെ പോസ്റ്റിനെ വിമര്‍ശിച്ചുള്ള ഒരു കമന്റിന് അരുണ്‍ ഗോപി മറുപടി നല്‍കി.
അതേസമയം, നിര്‍മാതാവ് സാന്ദ്ര തോമസ് ദീലിപിനെ പിന്തുണച്ച് രംഗത്തുവന്നതും വിമര്‍ശിക്കപ്പെട്ടിരുന്നു. മാമാട്ടിയെന്ന കുഞ്ഞിനെ മാത്രമാണ് തനിക്ക് ചിത്രത്തില്‍ കാണാനാവുന്നുള്ളൂയെന്നായിരുന്നു ദിലീപിനെ പിന്തുണച്ച് സാന്ദ്ര തോമസ് ഫേസ്ബുക്കിലെ കുറിച്ചത്.
