കോഴിക്കോട്: ഒ.ടി.ടി പ്ലാറ്റ്ഫോമുകള്‍ക്കെതിരെ പ്രതികരണവുമായി സംവിധായകന്‍ അടൂര്‍ ഗോപാലകൃഷ്ണന്‍. സിനിമ ഒ.ടി.ടിയില്‍ കാണുമ്പോള്‍ യഥാര്‍ഥ അര്‍ഥത്തോടെ കാണാന്‍ കഴിയില്ലെന്നും അങ്ങനെയാകുമ്പോള്‍ അത് ആ വര്‍ക്കിനോട് ചെയ്യുന്ന അനീതിയാണെന്നും അദ്ദേഹം പറഞ്ഞു.
ഒ.ടി.ടി റിലീസ് മുന്നില്‍ കണ്ട് സിനിമ ചെയ്യുന്നത് നിരാശാജനകമാണ് അത് സിനിമയുടെ അന്ത്യമായിരിക്കുമെന്നും അദ്ദേഹം പറഞ്ഞു. സന്‍സാദ് ടി.വിക്ക് വേണ്ടി ശശി തരൂര്‍ നടത്തിയ അഭിമുഖത്തിലായിരുന്നു അടൂരിന്റെ പ്രതികരണം.
‘തീയേറ്ററില്‍ കാണുന്ന അനുഭവം ഒരു മൊബൈല്‍ സ്‌ക്രീനില്‍ നിന്നോ ലാപ് ടോപ്പില്‍ നിന്നോ കിട്ടില്ല. ഓരോ ഫ്രെയ്മും ഒരു നിശ്ചിത സെക്കന്റ് സമയത്തേക്കാണ് നില്‍ക്കുക. ചെറിയ സ്‌ക്രീനുകളില്‍ സിനിമ കാണുന്നത് എന്നെ സംബന്ധിച്ച് സങ്കടകരമായ കാര്യമാണ്. സിനിമ തീയേറ്ററുകളില്‍ കാണാനുള്ളതാണ്.
ബിഗ് സ്‌ക്രീനില്‍ ആകുമ്പോള്‍ അത് കാണാന്‍ ആവശ്യമായ സമയം പ്രേക്ഷകന് ലഭിക്കും. ചെറിയ സ്‌ക്രീനില്‍ നിങ്ങള്‍ സിനിമ കാണുന്നില്ല, കഥാപാത്രങ്ങള്‍ സംസാരിക്കുന്നത് മാത്രമാണ് കേള്‍ക്കുക. എന്റെ സിനിമ മൊബൈലിലാണ് നിങ്ങള്‍ കാണുന്നതെങ്കില്‍ യഥാര്‍ഥ അര്‍ഥത്തോടെ നിങ്ങള്‍ ആ ചിത്രം കാണുന്നില്ല. അങ്ങനെ കാണുമ്പോള്‍ നിങ്ങള്‍ അത് എന്നോടും വര്‍ക്കിനോടും ചെയ്യുന്ന അനീതിയാണ്,’ അടൂര്‍ പറഞ്ഞു.
ഒ.ടി.ടി പ്ലാറ്റ്ഫോമുകള്‍ പ്രേക്ഷകരുടെ സിനിമ അനുഭവത്തെ ഇല്ലാതാക്കുന്നുവെന്നും മറ്റ് നിര്‍വാഹമില്ലാത്തതുകൊണ്ടാണ് ചിത്രങ്ങള്‍ ഒ.ടി.ടിയില്‍ റിലീസ് ചെയ്യുന്നതെന്നും അദ്ദേഹം കൂട്ടിച്ചേര്‍ത്തു.
സിനിമ ആള്‍ക്കൂട്ടത്തിനിടയിലിരുന്ന് തിയേറ്ററിലാണ് കാണേണ്ടതെന്നും ആ സാമൂഹിക അനുഭവമാണ് ഒ.ടി.ടി നഷ്ടമാക്കുന്നതെന്നും
സിനിമയുടെ വിസ്മയകരമായ ഘടകങ്ങളെയെല്ലാം അത് നഷ്ടപ്പെടുത്തുമെന്നും അടൂര്‍ വ്യക്തമാക്കി.
അതേസമയം, നിരന്തരം ഒ.ടി.ടിയില്‍ മാത്രമായി സിനിമകള്‍ റിലീസ് ചെയ്യുന്നു എന്ന് കാണിച്ച്് തിയേറ്റര്‍ ഉടമകള്‍ പൃഥ്വിരാജിന്റെ സിനിമകള്‍ വിലക്കണമെന്ന ആവശ്യവുമായി രംഗത്തെത്തിയിരുന്നു. കഴിഞ്ഞ ദിവസം നടന്ന സിനിമാ തിയേറ്റര്‍ ഉടമകളുടെ യോഗത്തിലായിരുന്നു ഇത്തരമൊരു ആവശ്യം ഉയര്‍ന്നത്.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
CONTENT HIGHLIGHTS: Director Adoor Gopalakrishnan reacts against OTT platforms.