തിരുവനന്തപുരം: ബി.ജെ.പി ആര്‍.എസ്.എസ് നേതൃത്വത്തെ രൂക്ഷമായി വിമര്‍ശിച്ച കടകംപള്ളി സുരേന്ദ്രന്‍.ശബരിമലയില്‍ സംഘപരിവാര്‍ രാഷ്ട്രീയം കളിക്കുകയാണെന്നും കേസ് നടത്തിയത് സംസ്ഥാന സര്‍ക്കാര്‍ അല്ല ആര്‍.എസ്.എസ് ആണന്നും അദ്ദേഹം കൂട്ടിച്ചേര്‍ത്തു
ശബരിമലയില്‍ നടക്കുന്ന കാര്യങ്ങള്‍ ലോകത്തെ അറിയിക്കാന്‍ എത്തിയ മാധ്യമപ്രവര്‍ത്തകരെ അധിക്ഷേപിച്ച നിങ്ങള്‍ എന്ത് കൊണ്ട് അവരോട് മാപ്പ് പറയുന്നില്ല. നിങ്ങള്‍ക്കെിരെ വാര്‍ത്ത കൊടുത്തവരെ നിങ്ങള്‍ തിരഞ്ഞുപിടിച്ചു തല്ലി എന്നും അദ്ദേഹം പറഞ്ഞു.
“അയ്യപ്പന്റെ പൂങ്കാവനത്തെ കലാപ ഭൂമിയാക്കുന്നത് ശരിയാണൊ. ബി.ജെ.പി ആത്മപരിശോധന നടത്താന്‍ തയ്യാറാകണം. ശ്രീധരന്‍പിള്ള രാഷ്ട്രീയപരമായ ആണത്വം കാണിക്കണം.”തീര്‍ത്ഥാടകരുടെ വേഷത്തില്‍ ആളെ എത്തിക്കാന്‍ ആഹ്വാനം ചെയ്യുന്ന ശബ്ദസന്ദേശം മാധ്യമ പ്രവര്‍ത്തകര്‍ക്ക് കേള്‍പ്പിച്ചു കൊടുത്ത ദേവസ്വം മന്ത്രി കടകംപള്ളി എന്താണ് ശ്രീധരന്‍ പിള്ളേ നിങ്ങളുടെ പരിപാടി എന്നു ചോദിച്ചു. വാര്‍ത്താ സമ്മേളനത്തിലാണ് കടകംപള്ളി ശ്രീധരന്‍പിള്ളക്കെതിരെ ചോദ്യങ്ങളുയര്‍ത്തിയത്.
സര്‍ക്കാര്‍ തെറ്റ് ചെയ്യുന്നു എന്ന് നിങ്ങള്‍ വീണ്ടും വീണ്ടും പറയുന്നു. ഗീബല്‍സിയന്‍ തന്ത്രം കേരളത്തില്‍ നടപ്പിലാക്കാന്‍ ശ്രമിക്കുകയാണ് നിങ്ങള്‍.സുപ്രീം കോടതി വിധി നടപ്പിലാക്കുന്നത് തെറ്റാണൊ. ബി.ജെ.പി ഭരിക്കുന്ന മഹാരാഷ്ട്ര സര്‍ക്കാര്‍ ഹൈകോടതി വിധി നടപ്പിലാക്കി ശനീക്ഷേത്രത്തില്‍ സ്ത്രീ പ്രവേശനം അനുവദിച്ചിരുന്നു. അത് തന്നെയാണ് സംസ്ഥാന സര്‍ക്കാരും ചെയ്യുന്നത്. നിങ്ങളുടേത് ഇരട്ടതാപ്പ്. നേരത്തെ ശ്രീധരന്‍ പിള്ള നടത്തിയ വാര്‍ത്താ സമ്മേളനത്തിന് മറുപടിയായി ദേവസ്വം മന്ത്രി പറഞ്ഞു.
ദേവസ്വം മന്ത്രി എന്ന നിലയിലുള്ള ഉത്തരവാദിത്വം നിര്‍വഹിക്കുകയാണ്. പ്രതിവര്‍ഷം ഒരു കോടി ആളുകള്‍ ഒത്തുചേരുന്ന പുണ്യസ്ഥലം ആണ് ശബരിമല. എല്ലാ തവണത്തേയും പോലെ ഇവിടെ കാര്യങ്ങള്‍ നടത്താന്‍ ആണ് സര്‍ക്കാര്‍ ശ്രമിക്കുന്നത് എന്നും കടകംപള്ളി സുരേന്ദ്രന്‍ പറഞ്ഞു.