ന്യൂദൽഹി: റോഹിങ്ക്യൻ അഭയാർഥികളുടെ മക്കളുടെ വിദ്യാഭ്യാസത്തിനുള്ള അവകാശം നിഷേധിക്കുക വഴി ദൽഹി സർക്കാർ വിലകുറഞ്ഞ
രാഷ്ട്രീയമാണ് നടത്തുന്നതെന്ന് അഭിഭാഷകൻ അശോക് അഗർവാൾ. റോഹിങ്ക്യൻ അഭയാർത്ഥികളുടെ കുട്ടികളെ താമസ സ്ഥലത്തിന് സമീപമുള്ള പ്രാദേശിക സ്കൂളുകളിൽ ചേർക്കാൻ അനുവദിക്കണമെന്ന് ആവശ്യപ്പെട്ടുള്ള പൊതുതാൽപര്യ ഹരജി ദൽഹി ഹൈക്കോടതി തള്ളിയതിനെ ചോദ്യം ചെയ്ത് അഭിഭാഷകൻ അശോക് അഗർവാൾ സുപ്രീം കോടതിയെ സമീപിച്ചു.

താൻ നേതൃത്വം നൽകുന്ന ദൽഹി ആസ്ഥാനമായുള്ള എൻ.ജി.ഒയായ സോഷ്യൽ ജൂറിസ്റ്റിന് വേണ്ടി അഗർവാൾ വ്യാഴാഴ്ച സുപ്രീം കോടതിയിൽ പ്രത്യേക ലീവ് പെറ്റീഷൻ (എസ്.എൽ.പി) ഫയൽ ചെയ്തു. റോഹിങ്ക്യൻ അഭയാർഥികളുടെ കുഞ്ഞുങ്ങൾക്ക് വിദ്യാഭ്യാസം നിഷേധിക്കരുതെന്ന് അദ്ദേഹം ആവശ്യപ്പെട്ടു.

‘റോഹിങ്ക്യൻ അഭയാർഥി കുട്ടികളുടെ കാര്യത്തിൽ സംഭവിക്കുന്നത് ദൗർഭാഗ്യകരവും ഭരണഘടനാ വിരുദ്ധവുമാണ്. വിദ്യാഭ്യാസ അവകാശ നിയമപ്രകാരം ഒരു കുട്ടിക്ക് വിദ്യാഭ്യാസം ലഭിക്കാൻ ഇന്ത്യൻ പൗരനായിരിക്കണമെന്ന് നിർബന്ധമില്ല. ഇത് കുട്ടികളുടെ അവകാശങ്ങളുടെ മാത്രമല്ല, അവരുടെ മാതാപിതാക്കളുടെ അവകാശങ്ങളുടെയും ലംഘനമാണ്, കാരണം അവർക്ക് കുട്ടികളെ പഠിപ്പിക്കാനുള്ള അവസരം നിഷേധിക്കപ്പെടുന്നു. കുട്ടികൾ നമ്മുടെ നാട്ടിൽ ഉള്ളിടത്തോളം കാലം, അവരുടെ പൗരത്വ നില പരിഗണിക്കാതെ അവർക്ക് വിദ്യാഭ്യാസം നൽകേണ്ടത് നമ്മുടെ ഉത്തരവാദിത്തമാണ്,’ അദ്ദേഹം പറഞ്ഞു.

ഡിസംബർ 20ന്, മുനിസിപ്പൽ കോർപ്പറേഷൻ ഓഫ് ദൽഹി (എം.സി.ഡി) വിദ്യാഭ്യാസ വകുപ്പിന് എം.സി.ഡി നടത്തുന്ന സ്കൂളുകളിൽ ചേർന്നിട്ടുള്ള അനധികൃത ബംഗ്ലാദേശി കുടിയേറ്റക്കാരുടെ കുട്ടികളെ തിരിച്ചറിയാൻ ഒരു ഡ്രൈവ് നടത്താൻ നിർദേശം നൽകി. മൂന്ന് ദിവസത്തിന് ശേഷം, ഈ കുട്ടികൾക്ക് പ്രവേശനം നൽകുന്നില്ലെന്ന് ഉറപ്പാക്കാൻ ദൽഹി സർക്കാർ നഗര-സംസ്ഥാനത്തെ സ്കൂളുകൾക്ക് വീണ്ടും നിർദേശം നൽകി.

2024 ഒക്‌ടോബറിൽ ഡൽഹിയിലെ ഖജൂരി ഖാസിലെ ശ്രീറാം കോളനി സന്ദർശിച്ചപ്പോഴാണ് നിരവധി റോഹിങ്ക്യൻ അഭയാർഥികൾക്ക് എം.സി.ഡിയും ദൽഹി സർക്കാരും നടത്തുന്ന സ്‌കൂളുകളിൽ പ്രവേശനം നിഷേധിക്കുന്നത് എങ്ങനെയെന്ന് കണ്ടെത്തിയെന്ന് അഗർവാൾ തൻ്റെ ഹരജിയിൽ പറഞ്ഞു.

ഒക്‌ടോബർ 29ന്, റോഹിങ്ക്യൻ അഭയാർഥികളുടെ കുട്ടികൾക്ക് പ്രവേശനം നൽകാൻ പ്രാദേശിക സ്‌കൂളുകൾക്ക് നിർദേശം നൽകണമെന്ന പൊതുതാത്പര്യ ഹരജി ദൽഹി ഹൈക്കോടതി തള്ളി. ഭരണഘടനയുടെയും ആർ.ടി.ഇ നിയമത്തിൻ്റെയും 2009ലെ ആർട്ടിക്കിൾ 14, 21, 21-എ എന്നിവ പ്രകാരം അഭയാർഥികളുടെ എല്ലാ കുട്ടികൾക്കും ദേശീയത പരിഗണിക്കാതെ തന്നെ വിദ്യാഭ്യാസത്തിന് അർഹതയുണ്ടെന്ന് വ്യക്തമാക്കുന്ന ഒരു നിർദ്ദേശം നവംബറിൽ പുറപ്പെടുവിക്കാൻ അശോക് അഗർവാൾ ആഭ്യന്തര മന്ത്രാലയത്തോട് ആവശ്യപ്പെട്ടു.

‘വിദ്യാഭ്യാസ അവകാശ നിയമം ആറിനും 14 നും ഇടയിൽ പ്രായമുള്ള എല്ലാ കുട്ടികൾക്കും സൗജന്യവും നിർബന്ധിതവുമായ വിദ്യാഭ്യാസം ഉറപ്പുനൽകുന്നു. സ്വകാര്യ സ്‌കൂളുകൾ 25 ശതമാനം സീറ്റുകൾ പാവപ്പെട്ട കുട്ടികൾക്കായി സംവരണം ചെയ്യണമെന്ന് നിർബന്ധിക്കുന്നു. എന്നിട്ടും, ഇത് പലപ്പോഴും അഭയാർത്ഥികളുടെ കുട്ടികൾക്ക് അപ്രാപ്യമായി തുടരുന്നു,’ അദ്ദേഹം പറയുന്നു.

Content Highlight: Denial of education to Rohingya kids ‘cheap politics,’ says lawyer arguing for their rights in SC