സ്ഥാനാര്‍ത്ഥിയുടെ തോല്‍വി; ആലപ്പുഴ സി.പി.ഐ.എമ്മില്‍ നിന്ന് 36 പേരെ പുറത്താക്കി
ഡൂള്‍ന്യൂസ് ഡെസ്‌ക്
Saturday, 9th January 2021, 8:42 am
അരൂക്കുറ്റി: ആലപ്പുഴയിലെ അരൂക്കുറ്റിയില്‍ സി.പി.ഐ.എമ്മില്‍ കൂട്ട അച്ചടക്ക നടപടി. ലോക്കല്‍ കമ്മിറ്റിയംഗം, മൂന്ന് ബ്രാഞ്ച് സെക്രട്ടറിമാര്‍ എന്നിവരുള്‍പ്പടെ 36 പാര്‍ട്ടി അംഗങ്ങളെ പുറത്താക്കിയതായാണ് റിപ്പോര്‍ട്ട്. അരൂക്കുറ്റി പഞ്ചായത്തിലെ മൂന്നാംവാര്‍ഡില്‍ പാര്‍ട്ടി സ്ഥാനാര്‍ഥി പരാജയപ്പെട്ടതാണ് നടപടിക്ക് കാരണം.
വാര്‍ഡിലെ പാര്‍ട്ടി ഘടകങ്ങള്‍ നിര്‍ദ്ദേശിച്ച കെ.എ.മാത്യുവിനെ പരിഗണിക്കാതെ ലോക്കല്‍ കമ്മിറ്റി പുതിയ സ്ഥാനാര്‍ഥിയെ പരിഗണിക്കുകയായിരുന്നു. തുടര്‍ന്ന് കെ.എ മാത്യു വിമതനായി മത്സരിച്ച് 128 വോട്ടിന് ജയിച്ചു. ഇതിന് പിന്നാലെ പഞ്ചായത്ത് ഭരണം യു.ഡി.എഫ്. പിടിച്ചതും പാര്‍ട്ടിക്കുള്ളില്‍ അസ്വാരസ്യം ഉണ്ടാക്കി. ഇതോടെയാണ് ലോക്കല്‍ കമ്മിറ്റി അച്ചടക്ക നടപടി സ്വീകരിച്ചത്.
