റാഞ്ചി: മോദി പരാമര്‍ശവുമായി ബന്ധപ്പെട്ട അപകീര്‍ത്തിക്കേസില്‍ കോണ്‍ഗ്രസ് നേതാവ് രാഹുല്‍ ഗാന്ധിക്ക് ഇളവ് നല്‍കി ജാര്‍ഖണ്ഡ് ഹൈക്കോടതി. രാഹുല്‍ ഗാന്ധിക്കെതിരെ നിര്‍ബന്ധിത നടപടികളെടുക്കരുതെന്നും അദ്ദേഹം നേരിട്ട് ഹാജരാകേണ്ടതില്ലെന്നും ജസ്റ്റിസ് എസ്.കെ. ദ്വിവേദി ഉത്തരവിട്ടു.
മാനനഷ്ടക്കേസില്‍ നേരിട്ട് ഹാജരാകണമെന്ന റാഞ്ചി എം.പി- എം.എല്‍.എ കോടതി ഉത്തരവിനെതിരെ രാഹുല്‍ ഗാന്ധി ഹൈക്കോടതിയെ സമീപിക്കുകയായിരുന്നു. കേസ് ഓഗസ്റ്റ് 16ന് കോടതി പരിഗണിക്കും.
ഇതേ കേസില്‍ ഗുജറാത്തിലെ സൂറത്ത് കോടതി മാര്‍ച്ച് 23ന് രാഹുല്‍ കുറ്റക്കാരനാണെന്ന് കണ്ടെത്തി രണ്ട് വര്‍ഷത്തെ തടവ് ശിക്ഷ വിധിച്ചിരുന്നു. തുടര്‍ന്ന് അദ്ദേഹത്തെ ലോക്‌സഭ എം.പി സ്ഥാനത്ത് നിന്ന് അയോഗ്യനാക്കി പാര്‍ലമെന്റ് നോട്ടീസ് നല്‍കുകയും ചെയ്തിരുന്നു.
ബി.ജെ.പി നേതാവ് പൂര്‍ണേഷ് മോദിയാണ് രാഹുല്‍ ഗാന്ധിക്കെതിരെ സൂറത്ത് കോടതിയില്‍ കേസ് കൊടുത്തത്.
എം.പി സ്ഥാനത്ത് നിന്ന് അയോഗ്യനായതിനെ തുടര്‍ന്ന് ദല്‍ഹിയിലെ തുഗ്ലക് ലൈനിലെ ഔദ്യോഗിക വസതിയും അദ്ദേഹം ഒഴിയേണ്ടി വന്നിരുന്നു.
മറ്റൊരു ബി.ജെ.പി നേതാവ് സുശീല്‍ കുമാറും രാഹുല്‍ ഗാന്ധിയുടെ പരാമര്‍ശത്തിനെതിരെ സമുദായത്തെ അപകീര്‍ത്തിപ്പെടുത്തിയെന്നാരോപിച്ച് പട്‌നയിലെ എം.പി, എം.എല്‍.എ എം.എല്‍.സി സ്‌പെഷ്യല്‍ കോടതിയില്‍ കേസ് കൊടുത്തിരുന്നു.
content highlights: Defamation case: Rahul Gandhi need not appear in person; Do not take coercive measures; Jharkhand Court granted relief
