ന്യൂദല്‍ഹി: റിപബ്ലിക്ക് ദിനത്തില്‍ ചെങ്കോട്ടയില്‍ ഉണ്ടായ സംഘര്‍ഷത്തില്‍ അറസ്റ്റിലായ പഞ്ചാബി നടന്‍ ദീപ് സിദ്ദു വീണ്ടും അറസ്റ്റിലായി. കേസില്‍ ജാമ്യം കിട്ടയതിന് തൊട്ടുപിന്നാലെയാണ് മറ്റൊരു കേസില്‍ സിദ്ധു വീണ്ടും അറസ്റ്റിലായത്.

റിപബ്ലിക് ദിനത്തിലെ അക്രമവുമായി ബന്ധപ്പെട്ട് ആര്‍ക്കിയോളജിക്കല്‍ സര്‍വേ ഓഫ് ഇന്ത്യ (എ.എസ്.ഐ) സമര്‍പ്പിച്ച എഫ്.ഐ.ആറിന്റെ അടിസ്ഥാനത്തിലാണ് ശനിയാഴ്ച സിദ്ദുവിനെ വീണ്ടും അറസ്റ്റ് ചെയ്തത്.

പ്രതിഷേധക്കാരെ പ്രേരിപ്പിച്ചുവെന്ന കേസിലാണ് ഫെബ്രുവരി 9ന് സിദ്ധുവിനെ അറസ്റ്റ് ചെയ്തത്. അതിനുശേഷം 14 ദിവസത്തെ റിമാന്‍ഡില്‍ സിദ്ധു കസ്റ്റഡിയിലായിരുന്നു.
30000 രൂപയുടെ സ്വന്തം ബോണ്ടിലാണ് വെള്ളിയാഴ്ച കോടതി സിദ്ധുവിന് ജാമ്യം നല്‍കിയത്.

റിപബ്ലിക് ദിനത്തില്‍ ചെങ്കോട്ടയിലുണ്ടാ സംഘര്‍ഷത്തില്‍ ദീപ് സിദ്ദുവും പ്രതിപ്പട്ടികയിലുള്‍പ്പെട്ടിരുന്നു. സംഘര്‍ഷത്തിന് ശേഷം ഏകദേശം 13 ദിവസത്തോളം ഒളിവില്‍ പോയ ഇയാള്‍ക്ക് വേണ്ടി പൊലീസ് ലുക്ക് ഔട്ട് നോട്ടീസ് വരെ പുറപ്പെടുവിച്ചിരുന്നു. ഒപ്പം ദീപ് സിദ്ദുവിനെ കുറിച്ച് വിവരം നല്‍കുന്നവര്‍ക്ക് ഒരു ലക്ഷം രൂപ ദല്‍ഹി പൊലീസ് പാരിതോഷികവും പ്രഖ്യാപിച്ചിരുന്നു.

റിപബ്ലിക്ക് ദിനത്തില്‍ ചെങ്കോട്ടയില്‍ നടന്ന സംഘര്‍ഷത്തിന് പിന്നില്‍ പഞ്ചാബി നടന്‍ ദീപ് സിദ്ദുവാണെന്ന് കര്‍ഷകര്‍ പറഞ്ഞിരുന്നു. കര്‍ഷകര്‍ക്കെതിരെ കേസെടുത്ത പൊലീസ് ഏറെ വൈകിയാണ് സിദ്ദുവിനെതിരെ കേസെടുത്തത്. ഗുണ്ടാ നേതാവ് ലക്കാ സാധനേയും പ്രതിചേര്‍ത്തിരുന്നു.

ദീപ് സിദ്ദുവിന്റെ നേതൃത്വത്തിലുള്ള ഒരു കൂട്ടം ആള്‍ക്കാരാണ് ചെങ്കോട്ടയിലേക്ക് കടന്നതെന്നും പതാക ഉയര്‍ത്തിയതെന്നും ഇയാള്‍ കേന്ദ്രസര്‍ക്കാരിന്റെ ഏജന്റാണെന്നും കര്‍ഷകര്‍ ആരോപണം ഉന്നയിച്ചിരുന്നു.

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ

Content Highlights: Deep Sidhu arrested after Delhi court granted him bail in Red Fort violence case