അമിത് ഷായുടെ നിര്‍ദ്ദേശപ്രകാരം നിങ്ങള്‍ക്കെതിരെ കേസെടുത്തിട്ടുണ്ടെങ്കില്‍ അതിനര്‍ഥം ചരിത്രത്തിന്റെ ശരിയായ വശത്താണ് നിങ്ങള്‍ എന്നാണ്: കനയ്യ കുമാര്‍
ഡൂള്‍ന്യൂസ് ഡെസ്‌ക്
Friday, 5th February 2021, 11:38 am
ന്യൂദല്‍ഹി: പരിസ്ഥിതി പ്രവര്‍ത്തക ഗ്രെറ്റ തന്‍ബര്‍ഗിന് പിന്തുണയുമായി സി.പി.ഐ നേതാവ് കനയ്യ കുമാര്‍. ഗ്രെറ്റയ്ക്കെതിരെ ദല്‍ഹി പൊലീസ് എഫ്.ഐ.ആര്‍ രജിസ്റ്റര്‍ ചെയ്ത സംഭവത്തിലായിരുന്നു കനയ്യയുടെ പ്രതികരണം.
ശരിയായ ദിശയിലാണ് ഗ്രെറ്റ പ്രവര്‍ത്തിക്കുന്നത് എന്നതിന്റെ തെളിവാണ് അമിത് ഷായുടെ നിര്‍ദ്ദേശം പ്രകാരം ദല്‍ഹി പൊലീസ് ഗ്രെറ്റയ്ക്കെതിരെ എഫ്.ഐ.ആര്‍ എടുത്തതെന്ന് കനയ്യ പറഞ്ഞു.
”പ്രിയപ്പെട്ട ഗ്രെറ്റ തന്‍ബര്‍ഗ് ക്ലബിലേക്ക് സ്വാഗതം! നിങ്ങള്‍ നല്ല പോരാട്ടമാണ് നടത്തുന്നതെന്നും ചരിത്രത്തിന്റെ ശരിയായ വശത്താണെന്നതിന്റെയും തെളിവാണ് ജയ് ഷായുടെ പിതാവിന്റെ നിര്‍ദേശപ്രകാരം ദല്‍ഹി പൊലീസ് നിങ്ങള്‍ക്കെതിരെ എടുത്ത എഫ്. ഐ.ആര്‍. ഇതിന്റെ ഭാഗമായി എന്റെ ചങ്ങാതിമാര്‍ ഇതിനകം ജയിലിലാണ്! പൊരുതികൊണ്ടിരിക്കുക!” അദ്ദേഹം പറഞ്ഞു.
