തിരുവനന്തപുരം: 10 വര്‍ഷം മുന്‍പ് തിരുവനന്തപുരം ഭരതന്നൂരില്‍ നടന്ന ദുരൂഹമരണത്തിന്റെ ചുരുളഴിക്കാന്‍ ഇന്ന് മൃതദേഹം പുറത്തെടുക്കും. ഏഴാം ക്ലാസ് വിദ്യാര്‍ഥിയായിരുന്ന ആദര്‍ശിന്റെ മൃതദേഹമാണ് റീ പോസ്റ്റ്‌മോര്‍ട്ടത്തിനും ഫൊറന്‍സിക് പരിശോധനകള്‍ക്കുമായി പുറത്തെടുക്കുക.
മുങ്ങിമരണമെന്ന് പൊലീസ് വിധിയെഴുതിയ കേസ് ക്രൈംബ്രാഞ്ച് അന്വേഷണത്തില്‍ കൊലപാതകമെന്നു കണ്ടെത്തിയതോടെയാണ് ഈ നടപടി. ഭരതന്നൂരിലെ കുളത്തിലാണ് കുട്ടിയുടെ മൃതദേഹം കണ്ടെത്തിയത്.
ആദര്‍ശിന്റെ കുഴിമാടത്തിനു ചുറ്റും ഇന്ന് കാടുകയറിക്കഴിഞ്ഞു. കുഴിമാടത്തെ അടയാളപ്പെടുത്തുന്നത് ഒന്നോ രണ്ടോ ചെടികള്‍ മാത്രമാണ്.
ഭരതന്നൂര്‍ രാമരശേരി വിജയവിലാസത്തില്‍ വിജയകുമാറിന്റെ മകന്‍ ആദര്‍ശ് വിജയനെയാണു പതിമൂന്നാം വയസില്‍ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയത്. ഭരതന്നൂര്‍ ഗവ. എച്ച്എസ്എസ് ഏഴാംക്ലാസ് വിദ്യാര്‍ഥിയായിരുന്നു. 2009 ഏപ്രില്‍ നാലിനു വൈകിട്ട് മൂന്നിനു കടയിലേക്കുപോയ ആദര്‍ശിനെ കാണാതാകുകയായിരുന്നു.
തിരച്ചിലില്‍ വീട്ടില്‍ നിന്നും അകലെയുള്ള വയലിലെ കുളത്തില്‍ ദുരൂഹ സാഹചര്യത്തില്‍ മൃതദേഹം കണ്ടെത്തുകയായിരുന്നു. തലയ്ക്കും നട്ടെല്ലിനുമേറ്റ പരിക്കാണ് മരണകാരണമെന്നായിരുന്നു പോസ്റ്റുമോര്‍ട്ടം റിപ്പോര്‍ട്ട്. അന്ന് താലൂക്ക് ആശുപത്രിയില്‍ വെച്ചാണ് പോസ്റ്റുമോര്‍ട്ടം നടത്തിയത്.
2009 ഏപ്രില്‍ അഞ്ചിന് പാല് വാങ്ങാനായി അടുത്ത കടയിലേക്ക് പോയ ആദര്‍ശിനെ പിന്നീട് കണ്ടെത്തുന്നത് വഴിയരികിലെ ഒരു കുളത്തില്‍ മരിച്ച നിലയിലാണ്. മുങ്ങിമരണമെന്ന് പാങ്ങോട് പൊലീസ് ആദ്യം തന്നെ വിധിയെഴുതി.
എന്നാല്‍ മാസങ്ങള്‍ക്ക് ശേഷം ലഭിച്ച പോസ്റ്റുമോര്‍ട്ടം റിപ്പോര്‍ട്ടില്‍ തലക്കേറ്റ മര്‍ദ്ദനമാണ് മരണകാരണമെന്ന് കണ്ടതോടെയാണ് പരാതി ഉയരുന്നത്. മകനെ വെള്ളത്തില്‍ നിന്ന് താന്‍ വാരിയെടുക്കുമ്പോള്‍ അവന്റെ കഴുത്ത് കിടന്ന് ആടുകയായിരുന്നെന്നും അടിച്ചാണ് അവര് അവനെ കൊന്നതെന്നും ആദര്‍ശിന്റെ അമ്മ പറഞ്ഞു.
കുട്ടിയുടെ ശ്വാസകോശത്തിലടക്കം വെള്ളം കയറിയിരുന്നില്ല. മുങ്ങിയല്ല കുട്ടി മരിച്ചതെന്ന് ഇതില്‍ നിന്നും വ്യക്തമാണ്. മറ്റൊന്ന് കുട്ടിയുടെ വസ്ത്രത്തിലടക്കം അന്ന് ബീജവും രക്തക്കറയും കണ്ടെത്തിയിരുന്നു. കുട്ടി കൊല്ലപ്പെട്ട ദിവസം കനത്ത മഴയായിരുന്നെങ്കിലും കുളത്തിന് കരയില്‍ മടക്കിയ നിലയില്‍ കണ്ടെത്തിയ വസ്ത്രം നനഞ്ഞിരുന്നില്ല.
എന്നിട്ടും കുട്ടിയെ ഉപദ്രവിച്ച് കൊലപ്പെടുത്തിയതാണെന്ന നിഗമനത്തില്‍ അന്ന് പൊലീസ് എത്തിയിയിരുന്നില്ല. ഇപ്പോള്‍ കൂടത്തായി ഉള്‍പ്പെടെയുള്ള വിഷയങ്ങള്‍ സജീവമായതോടെയാണ് പത്തുവര്‍ഷം മുന്‍പുള്ള ഈ കേസ് വീണ്ടും അന്വേഷിക്കുന്നത്. മൃതദേഹത്തിന്റെ ഡി.എന്‍.എ പരിശോധന അടക്കം നടത്തി കൊലപാതകിയിലേക്ക് എത്താമെന്ന പ്രതീക്ഷയിലാണ് പൊലീസ്.
കുറച്ചുപേരെ നുണപരിശോധനയ്ക്ക് വിധേയമാക്കാന്‍ പൊലീസ് ഒരുങ്ങുന്നുണ്ട്. നാലോ അഞ്ചോ പേര്‍ ക്രൈംബ്രാഞ്ചിന്റെ നിരീക്ഷണത്തിലാണെന്നാണ് അറിയുന്നത്.