ന്യൂദല്‍ഹി: ആംആദ്മി പാര്‍ട്ടിയില്‍ നിന്നു രാജിവെച്ച് കോണ്‍ഗ്രസിലേക്കു തിരിച്ചുപോയ എം.എല്‍.എയെ ദല്‍ഹി നിയമസഭയില്‍ നിന്ന് അയോഗ്യയാക്കി. ചാന്ദ്‌നി ചൗക്ക് എം.എല്‍.എയായിരുന്ന അല്‍ക ലംബയെയാണ് സ്പീക്കര്‍ രാം നിവാസ് കൂറുമാറ്റ നിരോധന നിയമ പ്രകാരം അയോഗ്യയാക്കിയത്.
സെപ്റ്റംബര്‍ ആറുമുതല്‍ മുന്‍കാല പ്രാബല്യത്തോടെ അയോഗ്യത നിലവില്‍ വന്നുകഴിഞ്ഞു. ആംആദ്മി എം.എല്‍.എ സൗരഭ് ഭരദ്വാജ് നല്‍കിയ പരാതിയിലാണ് സ്പീക്കറുടെ നടപടി.
ഈമാസം ആദ്യമാണ് ലംബ ഭരണകക്ഷി വിട്ട് തന്റെ മുന്‍ പാളയമായ കോണ്‍ഗ്രസിലേക്കു ചേക്കേറിയത്. നേരത്തേ കൂറുമാറ്റ നിരോധന നിയമപ്രകാരം ആംആദ്മി പാര്‍ട്ടി എം.എല്‍.എമാരായിരുന്ന കപില്‍ മിശ്ര, സന്ദീപ് കുമാര്‍, അനില്‍ ബാജ്‌പേയി, ദേവേന്ദ്ര സെഹ്‌റാവത് എന്നിവരെ അയോഗ്യരാക്കിയിരുന്നു.
അടുത്ത നിയമസഭാ തെരഞ്ഞെടുപ്പില്‍ കോണ്‍ഗ്രസ് സമീപിച്ചാല്‍ താന്‍ അവരുടെ ടിക്കറ്റില്‍ മത്സരിക്കുമെന്നും അല്ലെങ്കില്‍ സ്വതന്ത്രയായി നില്‍ക്കുമെന്നും ലംബ രണ്ടുമാസം മുന്‍പുതന്നെ വ്യക്തമാക്കിയിരുന്നു.
മുന്‍ പ്രധാനമന്ത്രി രാജീവ് ഗാന്ധിക്കു ഭാരതരത്‌ന നല്‍കാനുള്ള തീരുമാനം പുനഃപരിശോധിക്കുന്നതിനെതിരെ രംഗത്തെത്തിയ ആംആദ്മി പാര്‍ട്ടി എം.എല്‍.എമാരെ ലംബ വിമര്‍ശിച്ചതു കഴിഞ്ഞവര്‍ഷം അവസാനം വിവാദമായിരുന്നു.
ലംബയ്‌ക്കെതിരെ നടപടിയെടുക്കാന്‍ മുഖ്യമന്ത്രി അരവിന്ദ് കെജ്‌രിവാള്‍ തന്നെ മുന്നോട്ടുവന്നിരുന്നു. പാര്‍ട്ടിയിലെ ഉള്‍പ്പോരില്‍ മുഖ്യപങ്ക് വഹിക്കുന്നുവെന്നു പറയപ്പെടുന്ന ലംബ പ്രതിഷേധ സൂചകമായി എല്ലാ പാര്‍ട്ടി യോഗങ്ങളും ബഹിഷ്‌കരിക്കുന്നതു പതിവായിരുന്നു.
ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ
20 വര്‍ഷം കോണ്‍ഗ്രസില്‍ പ്രവര്‍ത്തിച്ചതിനു ശേഷമാണ് ലംബ 2014-ല്‍ ആംആദ്മിയില്‍ ചേര്‍ന്നത്. 2015-ല്‍ നടന്ന തെരഞ്ഞെടുപ്പില്‍ നിയമസഭയിലേക്കു തെരഞ്ഞെടുക്കപ്പെട്ടു. ബി.ജെ.പിയുടെ സുമന്‍ കുമാര്‍ ഗുപ്തയെയാണ് പരാജയപ്പെടുത്തിയത്.
2003-ല്‍ കോണ്‍ഗ്രസ് ടിക്കറ്റില്‍ മോട്ടിനഗറില്‍ നിന്ന് മത്സരിച്ചിരുന്നെങ്കിലും ബി.ജെ.പിയുടെ മദല്‍ലാല്‍ ഖുറാനയോട് പരാജയപ്പെട്ടിരുന്നു.
ദല്‍ഹി സര്‍വകലാശാലാ വിദ്യാര്‍ഥി യൂണിയന്‍ പ്രസിഡന്റായി രാഷ്ട്രീയജീവിതം തുടങ്ങിയ ലംബ എന്‍.എസ്.യു ദേശീയ പ്രസിഡന്റുമായിരുന്നു.
ദല്‍ഹി പി.സി.സി ജനറല്‍ സെക്രട്ടറി, എ.ഐ.സി.സി സെക്രട്ടറി, ഗോ ഇന്ത്യാ ഫൗണ്ടേഷന്‍ മുന്‍ ചെയര്‍പേഴ്‌സണ്‍, മഹിളാ കോണ്‍ഗ്രസ് ജനറല്‍ സെക്രട്ടറി എന്നീ നിലകളില്‍ പ്രവര്‍ത്തിച്ചിട്ടുണ്ട്.