ഐ.പി.എല്ലില്‍ രാജസ്ഥാന്‍ റോയല്‍സിനെതിരായ മത്സരത്തില്‍ തോല്‍ക്കാനായിരുന്നു ദല്‍ഹി ക്യാപ്പിറ്റല്‍സിന്റെ വിധി. രാജസ്ഥാന്‍ ഉയര്‍ത്തിയ 200 റണ്‍സിന്റെ വിജയലക്ഷ്യം പിന്തുടര്‍ന്നിറങ്ങിയ ക്യാപ്പിറ്റല്‍സിന് നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 142 റണ്‍സ് മാത്രമേ നേടാന്‍ സാധിച്ചിരുന്നുള്ളൂ. ഇതോടെ 57 റണ്‍സിന്റെ കൂറ്റന്‍ വിജയമണ് രാജസ്ഥാന്റെ പേരില്‍ കുറിക്കപ്പെട്ടത്.
ബാറ്റിങ് നിര പൂര്‍ണമായും മങ്ങിയതാണ് ക്യാപ്പിറ്റല്‍സിന് തിരിച്ചടിയായത്. 55 പന്തില്‍ നിന്നും 65 റണ്‍സ് നേടിയ ക്യാപ്റ്റന്‍ ഡേവിഡ് വാര്‍ണറിന് പിന്തുണ നല്‍കാന്‍ ആരുമില്ലാതെ പോയി.
24 പന്തില്‍ നിന്നും 38 റണ്ണടിച്ച ലളിത് യാദവും പൊരുതാന്‍ ശ്രമിച്ചെങ്കിലും റോയല്‍സ് ബൗളര്‍മാര്‍ അതിന് അനുവദിച്ചില്ല. ഇവര്‍ക്ക് പുറമെ റിലി റൂസോ മാത്രമേ ബാറ്റിങ് നിരയില്‍ ഇരട്ടയക്കം കണ്ടുള്ളൂ.
രാജസ്ഥാനെതിരായ മത്സരത്തിന് മുമ്പ് 164 മത്സരത്തില്‍ നിന്നും 5,974 റണ്‍സായിരുന്നു വര്‍ണറിന്റെ പേരിലുണ്ടായിരുന്നത്. മത്സരത്തിലെ മികച്ച ബാറ്റിങ്ങാണ് താരത്തിന് തുണയായത്.
