കൊച്ചി: പൃഥ്വിരാജ് ചിത്രം രണത്തിന്റെ പുതിയ ടീസര്‍ പുറത്തിറങ്ങി. ചിത്രത്തിലെ മറ്റൊരു നായകനായ റഹ്മാന്‍ ക്യാരക്റ്റര്‍ ടീസറാണ് പുറത്തിറങ്ങിയത്.പ്രേക്ഷക ശ്രദ്ധ നേടിയ ചിത്രമായ മുംബൈ പൊലീസിനുശേഷം പൃഥ്വിരാജും റഹ്മാന്‍ വീണ്ടും ഒന്നിക്കുന്ന ചിത്രം കൂടിയാണ് രണം.
ശ്യാമപ്രസാദ് ചിത്രം “ഹേയ്, ജൂഡ്” ന്റെ തിരക്കഥാകൃത്ത് നിര്‍മല്‍ സഹദേവാണ് ചിത്രത്തിന്റെ സംവിധാനം. ആക്ഷന് പ്രാധാന്യം നല്‍കിക്കൊണ്ട് ഒരുക്കുന്ന ചിത്രമാണ് രണമെന്ന് മുമ്പിറങ്ങിയ രണ്ട് ടീസറുകളില്‍ നിന്ന് വ്യക്തമായിരുന്നു.
ഹോളിവുഡ് സ്റ്റണ്ട് കോര്‍ഡിനേറ്റര്‍മാരായ ക്രിസ്റ്റിയല്‍ ബ്രൂനെറ്റി, ഡേവിസ് അലസി, ആരോമല്‍, എന്നിവരാണ് ചിത്രത്തിലെ ആക്ഷന് രംഗങ്ങള്‍ ഒരുക്കിയിരിക്കുന്നത്. പൂര്‍ണ്ണമായും അമേരിക്കയില്‍ ചിത്രീകരിച്ചിരിക്കുന്ന ചിത്രത്തില്‍ ഇഷ തല്‍വാറാണ് നായികയായെത്തുന്നത്.
ഹൗസ് ഓഫ് കാര്‍ഡ്‌സ്, മര്‍ഡര്‍ കാള്‍സ് തുടങ്ങിയ സീരീസുകളുടെ സംഘട്ടന സംവിധായകരിലൊരാളായ ക്രിസ്ത്യന്‍ ബ്രൂനെറ്റിയാണ് രണത്തിന് സംഘട്ടനമൊരുക്കുന്നത്. ജിഗ്മി ടെന്‍സിങ് ആണ് ഛായാഗ്രഹണം നിര്‍വഹിക്കുന്നത്. ജെയ്ക്‌സ് ബിേജായ് ആണ് സംഗീതം. ചിത്രം ഉടന്‍ തീയേറ്ററുകളിലെത്തും.