ഇന്ത്യ – ദക്ഷിണാഫ്രിക്ക ടി-20 പരമ്പരയിലെ രണ്ടാം മത്സരത്തിലും ഇന്ത്യ ദയനീയമായി പരാജയപ്പെട്ടിരുന്നു. ആദ്യമത്സരത്തിന്റെ മികവ് പോലും പുലര്‍ത്താതെയാണ് ഇന്ത്യ രണ്ടാം മത്സരത്തില്‍ പരാജയപ്പെട്ടത്.
കട്ടക്കിലെ ബരാബതി സ്റ്റേഡിയത്തില്‍ ക്യാപ്റ്റന്‍ റിഷബ് പന്തിന്റെ കണ്ണീര്‍ ഒരിക്കല്‍ക്കൂടി വീഴുകയായിരുന്നു. ബൗളിംഗിലെ പോരായ്മ തന്നെയാണ് ഇന്ത്യയ്ക്ക് വീണ്ടും വിനയായത്.
ഇന്‍ ഫോം ബൗളര്‍ യൂസ്വേന്ദ്ര ചഹല്‍ അടിവാങ്ങിക്കൂട്ടിയതോടെയാണ് ഇന്ത്യയുടെ പരാജയം വേഗത്തിലായത്. പത്ത് പന്ത് ബാക്കി നില്‍ക്കവെയായിരുന്നു ഇന്ത്യയുടെ പരാജയം.
ഇന്ത്യന്‍ നിരയില്‍ ഭുവനേശ്വര്‍ കുമാര്‍ മാത്രമാണ് പ്രതീക്ഷ കാത്തത്. പ്രതീക്ഷകള്‍ അസ്ഥാനത്താക്കിയതാവട്ടെ ചഹലും.
ഐ.പി.എല്ലിലെ വിക്കറ്റ് വേട്ടക്കാരില്‍ മുമ്പനായിരുന്ന ചഹലാണോ ഇപ്പോള്‍ പന്തെറിയുന്നത് എന്ന് തോന്നിപ്പോവുന്ന തരത്തിലാണ് താരം അടിവാങ്ങിക്കൂട്ടുന്നത്. ഐ.പി.എല്‍ കഴിഞ്ഞ് രണ്ടാഴ്ച കഴിഞ്ഞപ്പോഴേക്കും താരത്തിന്റെ ഫോം എവിടെപ്പോയി എന്ന സംശയത്തിലാണ് ആരാധകര്‍.
