നെയ്മറിന് പകരം അല്‍ ഹിലാല്‍ കൊണ്ടുവരാന്‍ പോകുന്നത് ഇതിഹാസത്തെ; ഞെട്ടിത്തരിച്ച് ഫുട്‌ബോള്‍ ലോകം, റിപ്പോര്‍ട്ട്

ഫുട്ബോള്‍ ലോകത്തെ മികച്ച താരങ്ങളില്‍ ഒരാളാണ് ബ്രസീലിന്റെ നെയ്മര്‍ ജൂനിയര്‍. എന്നാല്‍ ഏറെ കാലങ്ങളായി താരം പരിക്കിന്റെ പിടിയിലായിരുന്നു. ഇതോടെ കോപ്പ അമേരിക്ക പോലുള്ള നിരവധി ടൂര്‍ണമെന്റുകള്‍ താരത്തിന് നഷ്ടപ്പെടുത്തേണ്ടി വന്നിരുന്നു. നിലവില്‍ അല്‍ ഹിലാലിന് വേണ്ടി കളിക്കുന്ന താരത്തിന്റെ ക്ലബ്ബുമായുള്ള കോണ്‍ട്രാക്ട് അടുത്തവര്‍ഷം ജനുവരിയോടെ അവസാനിക്കാനിരിക്കുകയാണ്.

ഇതോടെ അല്‍ ഹിലാല്‍ ആരെയാണ് ടീമില്‍ എത്തിക്കാനൊരുങ്ങുന്നതെന്ന ചര്‍ച്ചകളാണ് ഫുട്‌ബോള്‍ ലോകത്ത് നടക്കുന്നത്. ഇപ്പോള്‍ പുറത്ത് വരുന്ന ചില റിപ്പോര്‍ട്ടുകളുടെ അടിസ്ഥാനത്തില്‍ നെയ്മറിനെ ക്ലബ്ബ് വിട്ടയച്ചാല്‍ ഇതിഹാസ താരം ക്രിസ്റ്റിയാനോ റൊണാള്‍ഡോയെ ടീമിലെത്തിക്കാനാണ് അല്‍ ഹിലാലിന്റെ ശ്രമം.

നിലവില്‍ അല്‍ നസറിന് വേണ്ടി മികച്ച പ്രകടനം കാഴ്ചവെക്കുന്ന റൊണാള്‍ഡോയുടെ കരാറും അവസാനിക്കാനിരിക്കുകയാണ്. ക്ലബ്ബ് റൊണാള്‍ഡോയെ വിട്ടയച്ചാല്‍ എന്ത് വിലകൊടുത്തും താരത്തെ റാഞ്ചാന്‍ ഒരുങ്ങിയിരിക്കുകയാണ്.

മാഞ്ചസ്റ്റര്‍ യുണൈറ്റഡില്‍ നിന്ന് വന്‍ തുകക്ക് സൗദിയില്‍ എത്തിയ ശേഷം 39 കാരനായ റൊണാള്‍ഡോ അല്‍ നസറിന് വേണ്ടി 78 മത്സരങ്ങളില്‍ നിന്ന് 68 ഗോളുകളാണ് നേടിയത്. മാത്രമല്ല തന്റെ ഫുട്‌ബോള്‍ കരിയറില്‍ 908 ഗോളുകള്‍ നേടാനും താരത്തിന് സാധിച്ചു.

കറ്റാലന്‍ മീഡിയ ഔട്ട്ലെറ്റ് സ്പോര്‍ട്‌സിന്റെ റിപ്പോര്‍ട്ട് പ്രകാരം 32 കാരനായ നെയ്മര്‍ പരിക്കിന്റെ പിടിയില്‍ ആയതിനാല്‍ അല്‍ ഹിലാല്‍ ഇനിയും നെയ്മറിന് വേണ്ടി പോകില്ലെന്നാണ്. സൈന്‍ ചെയ്ത ശേഷം വെറും ഏഴ് മത്സരം മാത്രമാണ് താരത്തിന് ക്ലബ്ബില്‍ കളിക്കാന്‍ സാധിച്ചത്. ഒരു ഗോളും മൂന്ന് അസിസ്റ്റുമാണ് താരത്തിന് നേടാന്‍ സാധിച്ചത്.

ലഭിക്കുന്ന റിപ്പോര്‍ട്ടുകളുടെ അടിസ്ഥാനത്തില്‍ ക്ലബ്ബുകള്‍ താരങ്ങളെ വിട്ടുകൊടുത്താല്‍ വമ്പന്‍ മാറ്റങ്ങള്‍ക്കാകും ഫുട്‌ബോള്‍ ലോകം സാക്ഷ്യം വഹിക്കുക.

Content Highlight: Cristiano Ronaldo will Play For Al Hilal instead of Neymar, Report