കളിയുടെ പവറില്ലെങ്കിലും സോഷ്യല്‍ മീഡിയയിലെ രസകരമായ പോസ്റ്റുകളിലൂടെ ക്രിക്കറ്റ് ആരാധകര്‍ക്ക് പരിചിതമായ ടീമണ് ഐസ്‌ലാന്‍ഡ്. ടീഎന്നത്തേയും പോലെ ടീമിന്റെ രസകരമായ മറ്റൊരു പോസ്റ്റാണ് ഇപ്പോള്‍ ചര്‍ച്ചാ വിഷയം.
ടി-20 ഫോര്‍മാറ്റില്‍ തങ്ങള്‍ തോല്‍പിച്ച ടീമുകളുടെയും തങ്ങള്‍ക്ക് തോല്‍പിക്കാന്‍ സാധിക്കുന്ന ടീമുകളുടെയും ലിസ്റ്റ് പങ്കുവെച്ചാണ് ഐസ്‌ലാന്‍ഡ് ചര്‍ച്ചകള്‍ക്ക് തുടക്കമിട്ടിരിക്കുന്നത്.
പേര് പോലും കേള്‍ക്കാത്ത ക്രിക്കറ്റ് ടീമുകള്‍ക്കൊപ്പം പാകിസ്ഥാനെയും തങ്ങള്‍ക്ക് തോല്‍പിക്കാന്‍ സാധിക്കുമെന്നാണ് ക്രിക്കറ്റ് ഐസ്‌ലാന്‍ഡ് പങ്കുവെച്ച പോസ്റ്റിലുള്ളത്.
ഇതോടെ ആരാധകരും പോസ്റ്റിന് പിന്നാലെ കൂടിയിരിക്കുകയാണ്. പാകിസ്ഥാനെയും ഉള്‍ക്കൊള്ളിച്ച നിങ്ങളുടെ ആത്മവിശ്വാസം സമ്മതിച്ച് തന്നേ പറ്റൂ എന്നും ഇനി ഓസ്‌ട്രേലിയയെ കൂടി തോല്‍പിക്കുന്ന കാര്യം പരിഗണിക്കണമെന്നും ആരാധകര്‍ പറയുന്നു.
ഇക്കഴിഞ്ഞ പാകിസ്ഥാന്‍ – അയര്‍ലാന്‍ഡ് പരമ്പരക്ക് പിന്നാലെയാണ് പോസ്റ്റിലെ ഉള്ളടക്കം ആരാധകര്‍ വിലയിരുത്തുന്നത്.
മൂന്ന് മത്സരങ്ങളടങ്ങിയ ടി-20 പരമ്പര പാകിസ്ഥാന്‍ സ്വന്തമാക്കിയിരുന്നെങ്കിലും ആദ്യ മത്സരത്തില്‍ ഐറിഷ് ടീമിനോട് പരാജയപ്പെടേണ്ടി വന്നത് ഏറെ വിമര്‍ശനങ്ങള്‍ക്കും കളിയാക്കലുകള്‍ക്കും കാരണമായിരുന്നു. ഇതിന് പിന്നാലെയാണ് ഇപ്പോള്‍ ഐസ്‌ലാന്‍ഡ് ക്രിക്കറ്റും പോസ്റ്റ് പങ്കുവെച്ചിരിക്കുന്നത്.
അതേസമയം, ലോകകപ്പിന് മുമ്പ് നടക്കുന്ന ടി-20 പരമ്പരയുടെ തിരക്കിലാണ് പാകിസ്ഥാന്‍. ഇംഗ്ലണ്ടിനെതിരെ ഇംഗ്ലണ്ടിലെത്തി നാല് മത്സരങ്ങളുടെ പരമ്പരയാണ് പാകിസ്ഥാന്‍ കളിക്കുക.
മെയ് 22നാണ് പരമ്പരയിലെ ആദ്യ മത്സരം. ഹെഡിങ്‌ലിയാണ് വേദി.
Content highlight: Cricket Iceland mocks Pakistan cricket team