പാലക്കാട്: ആദിവാസി കോളനിയിലെ എസ്.ടി പ്രമോട്ടര്‍ക്ക് സി.പി.ഐ.എം ലോക്കല്‍ സെക്രട്ടറിയുടെ ഭീഷണി. കോളനികളിലുള്ളവര്‍ക്ക് മഴക്കെടുതി കിറ്റ് പാര്‍ട്ടി അറിയാതെ വിതരണം ചെയ്തതിനാണ് പാലക്കാട് അയിലൂര്‍ ലോക്കല്‍ കമ്മിറ്റി സെക്രട്ടറി സജിത്ത് എസ്.ടി പ്രമോട്ടര്‍ മണികണ്ഠനെ ഭീഷണിപ്പെടുത്തിയത്.
മണികണ്ഠനെ ഭീഷണിപ്പെടുത്തുന്നതിന്റെ ഫോണ്‍ സംഭാഷണം സമൂഹ മാധ്യമങ്ങള്‍ വഴി പുറത്താകുകയായിരുന്നു. മണികണ്ഠന് ജോലി നല്‍കിയത് പാര്‍ട്ടിയാണെന്നും പാര്‍ട്ടി അറിയാതെ പരിപാടി നടത്തിയാല്‍ ജോലി കളയുമെന്നുമായിരുന്നു സജിത്തിന്റെ ഭീഷണി.
‘പാര്‍ട്ടി അറിയാതെ പരിപാടി നടത്തിയാല്‍ നിന്റെ പണി പീസാക്കിത്തരും. നിന്നെ വട്ടപൂജ്യമാക്കും. എസ്.ടി പ്രമോട്ടറാക്കിയത് ഈ പാര്‍ട്ടിയല്ലെ. പാര്‍ട്ടി അറിയാതെ അനങ്ങിയാല്‍ മറ്റേ പാര്‍ട്ടിക്കാര്‍ ഉണ്ടാകില്ല’ എന്നിങ്ങനെയാണ് സജിത്ത് ഭീഷണപ്പെടുത്തുന്നത്.
സംഭവത്തില്‍ സി.പി.ഐ.എമ്മിന് പരാതി നല്‍കിയതായി മണികണ്ഠന് പറഞ്ഞു. താനും പാര്‍ട്ടിക്കാരനാണെന്നും പഞ്ചായത്ത് പ്രസിഡന്റ് ഉള്‍പ്പെടെയുള്ളവരെ അറിയിച്ചാണ് കിറ്റ് വിതരണം നടത്തിയതെന്നും അദ്ദേഹം പറഞ്ഞു.
സജിത്ത് ഈ അടുത്ത് നടന്ന ലോക്കല്‍ സമ്മേളനത്തില്‍ തെരഞ്ഞെടുക്കപ്പെട്ട പുതിയ സെക്രട്ടറിയാണ്. അദ്ദേഹത്തിന് ഇതുസംബന്ധിച്ച നടപടി ക്രമങ്ങള്‍ അറിയില്ലെന്നും മണികണ്ഠന് പറഞ്ഞു.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
CONTENT HIGHLIGHTS: CPI M local secretary threatens ST promoter