മാഡ്രിഡ്: റിവര്‍പ്ലേറ്റ് -ബൊക്ക ജൂനിയര്‍ തമ്മിലുള്ള കോപ്പ ലിബര്‍ട്ടഡോറസ് രണ്ടാം പാദ ഫൈനല്‍ ഇന്ന് റയല്‍ മാഡ്രിഡിന്റെ മൈതാനമായ സാന്റിയാഗോ ബെര്‍ണബ്യുവില്‍ നടക്കും ബൊക്ക ജൂനിയറിന്റെ മൈതാനിയില്‍ നടന്ന ആദ്യ പാദ മത്സരത്തില്‍ ഇരുടീമും രണ്ട് വീതം ഗോളടിച്ച് സമനിലയില്‍ പിരിഞ്ഞിരുന്നു.
റിവര്‍പ്ലേറ്റ് ആരാധകര്‍ ബൊക്കാ ജൂനിയര്‍ താരങ്ങള്‍ക്ക് നേരെ ആക്രമണം അഴിച്ചുവിട്ട സാഹചര്യത്തിലാണ് വേദി മാറ്റിയത്. ആക്രമണത്തില്‍ അര്‍ജന്റീനന്‍ മുന്‍താരം ടെവസടക്കമുള്ള താരങ്ങള്‍ക്ക് പരുക്കേറ്റിരുന്നു.
ആദ്യപാദത്തില്‍ രണ്ട് ഗോൡന് പിന്നിട്ട് നിന്ന ശേഷമാണ് റിവര്‍പ്ലേറ്റ് സമനില പിടിച്ചത്. അതേസമയം വേദിമാറ്റിയതോടെ എവേ ഗോളിന്റെ ആനുകൂല്യം റിവര്‍പ്ലേറ്റിന് ലഭിക്കില്ല.
ALSO READ: പുരസ്‌കാരം നിഷേധിച്ച് ലിവര്‍പൂള്‍ താരം മുഹമ്മദ് സലാഹ്
റിവര്‍പ്ലേറ്റിനായി റാഫോല്‍ സാന്റോസ് മുന്നേറ്റത്തില്‍ നേതൃത്വം കൊടുക്കുമ്പോള്‍ മധ്യനിരയില്‍ എന്‍സോ പെരസാകും കളി മെനയുക.
ബൊക്ക ജൂനിയറിനായി സൂപ്പര്‍താരം ക്രിസ്റ്റ്യന്‍ പവോണാകും ആക്രമണത്തിന് നേതൃത്വം കൊടുക്കുക. നായകന്‍ പാബ്ലോ പെരസ് മധ്യനിരയില്‍ കളിക്കുമ്പോള്‍ ലിസനാര്‍ഡോ മെഗല്ലന്‍ പ്രതിരോധക്കോട്ട കാക്കും.
10 തവണ ബൊക്ക ജൂനിയര്‍ ഫൈനല്‍ കളിച്ചപ്പോള്‍ ആറുതവണയാണ് കിരീടത്തില്‍ മുത്തമിട്ടത്. അഞ്ച് തവണ റിവര്‍പ്ലേറ്റ് കലാശപ്പോരിനിറങ്ങിയപ്പോള്‍ അഞ്ചുവട്ടവും കിരീടമുയര്‍ത്തി.
മത്സരം വീക്ഷിക്കാന് സൂപ്പര് താരങ്ങളായ ക്രിസ്റ്റ്യാനോ റൊണാള്ഡോയും ലയണല് മെസിയും എത്തുമെന്നും സൂചനയുണ്ട്.