പേര് കൊണ്ടാണ് ഹേമന്ത് ജി. നായര്‍ സംവിധാനം ചെയ്ത ചിത്രം ഹിഗ്വിറ്റ ആദ്യം ശ്രദ്ധാകേന്ദ്രമായത്. ഹിഗ്വിറ്റ എന്നത് തന്റെ ചെറുകഥയുടെ പേരാണെന്ന് പറഞ്ഞ് എഴുത്തുകാരന്‍ എന്‍.എസ്. മാധവന്‍ രംഗത്തെത്തിയതോടെയാണ് വിവാദങ്ങള്‍ക്ക് തുടക്കമായത്. ഹിഗ്വിറ്റ എന്ന തന്റെ കഥക്ക് മേല്‍ തനിക്ക് യാതൊരു അവകാശവും ഇല്ലാതെ പോകുന്നത് സങ്കടകരമാണെന്നും എന്‍.എസ്. മാധവന്‍ പറഞ്ഞിരുന്നു. ഈ വിവാദങ്ങള്‍ മുറുകുമ്പോഴും സിനിമയുടെ പേര് മാറ്റില്ലെന്ന തീരുമാനത്തില്‍ അണിയറപ്രവര്‍ത്തകര്‍ ഉറച്ചുനില്‍ക്കുകയായിരുന്നു.
ഈ വിവാദങ്ങള്‍ കൊണ്ട് തന്നെ പേരുമായി കണക്ഷനായിരിക്കും സിനിമ കാണുന്ന ഓരോ പ്രേക്ഷകനും നോക്കുന്നത്. കൊളംബിയന്‍ ഫുട്‌ബോള്‍ ടീമിന്റെ ഗോള്‍കീപ്പറായിരുന്നു റെനെ ഹിഗ്വിറ്റ. ഫുട്‌ബോള്‍ പ്രേമികള്‍ക്കെല്ലാം സുപരിചിതനായ കളിക്കാരന്‍. കളിശൈലി കൊണ്ട് തന്നെയാണ് ഹിഗ്വിറ്റ എന്ന ഗോളി ചരിത്രത്തില്‍ അടയാളപ്പെടുത്തപ്പെടുന്നത്.
ഗോളിക്ക് നിശ്ചയിച്ചിരുന്ന പരിധികള്‍ ലംഘിച്ച് മൈതാനത്തേക്ക് ഇറങ്ങിക്കളിക്കുമായിരുന്ന ഹിഗ്വിറ്റയുടെ കളിശൈലി മൈതാനത്തിന് പുതുമയായിരുന്നു.
