ബെംഗളൂരു: കോണ്ഗ്രസ് നേതാവും മുന് മുഖ്യമന്ത്രിയുമായ സിദ്ധരാമയ്യക്ക് നേരെ മുട്ടയെറിയുകയും കരിങ്കൊടി വീശുകയും ചെയ്ത സംഭവത്തില് കോണ്ഗ്രസ് പ്രവര്ത്തകന് അറസ്റ്റില്. സോംവാര്പേട്ട് സ്വദേശിയായ സമ്പത് എന്ന യുവാവിനെയാണ് സംഭവവുമായി ബന്ധപ്പെട്ട് പൊലീസ് അറസ്റ്റ് ചെയ്തിരിക്കുന്നത്.
സമ്പത് സിദ്ധരാമയ്യയുടെ വാഹനത്തിന് നേരെ മുട്ടയെറിയുന്നതിന്റെ ദൃശ്യങ്ങള് പൊലീസിന് ലഭിച്ചതായാണ് റിപ്പോര്ട്ട്. പ്രതി കുറ്റം സമ്മതിച്ചതായും പൊലീസിനെ ഉദ്ധരിച്ച് ഡെക്കാന് ഹെറാള്ഡ് റിപ്പോര്ട്ട് ചെയ്യുന്നു.
ടിപ്പു സുല്ത്താന്, ബീഫ് വിഷയങ്ങളില് സിദ്ധരാമയ്യയോട് അഭിപ്രായവ്യത്യാസം തോന്നിയെന്നും ഇതിനാലാണ് മുട്ടയെറിഞ്ഞതെന്നും പ്രതി പൊലീസിനോട് പറഞ്ഞു.
വ്യാഴാഴ്ച കുടക് ജില്ലയില് മഴക്കെടുതി ബാധിച്ച പ്രദേശങ്ങള് സന്ദര്ശനത്തിനിടെയായിരുന്നു സിദ്ധരാമയ്യക്ക് നേരെ ആക്രമണമുണ്ടായത്. സംഘം ചേര്ന്നെത്തിയ പ്രതികള് കുശാല്നഗറിലെ ഗുഡ്ഡെഹോസൂരില് വെച്ച് സിദ്ധരാമയ്യ സഞ്ചരിച്ച വാഹനത്തിന് നേരെ കരിങ്കൊടി കാണിക്കുകയും കാറിന് നേരെ മുട്ടയെറിയുകയുമായിരുന്നു.
സംഭവത്തിന് പിന്നാലെ സിദ്ധരാമയ്യക്ക് സുരക്ഷയൊരുക്കാന് പൊലീസ് ജനറലിനോട് ആവശ്യപ്പെട്ടിട്ടുണ്ടെന്ന് കര്ണാടക ആഭ്യന്തര മന്ത്രി അരഗ ജ്ഞാനേന്ദ്ര പറഞ്ഞു.
കഴിഞ്ഞ കുറച്ച് ദിവസങ്ങളായി ശിവമോഗയില് വര്ഗീയ കലാപം തുടരുകയാണ്.
സ്വാതന്ത്ര്യദിനത്തോടനുബന്ധിച്ച് ബി.എച്ച് റോഡിലെ സിറ്റി സെന്റര് മാളില് നടന്ന ചിത്രപ്രദര്ശനത്തില് സ്വാതന്ത്ര്യസമര സേനാനികളോടൊപ്പം സവര്ക്കറിന്റെ ചിത്രവും ഉള്പ്പെടുത്തിയിരുന്നു. ഇതോടെയാണ് സംഭവത്തില് പ്രതിഷേധം ശക്തമായത്. സംഭവത്തിനെതിരെ പ്രതിഷേധിച്ച യുവാവിന്റെ വീഡിയോയും സമൂഹ മാധ്യമങ്ങളില് വൈറലായിരുന്നു.
മഹാത്മാ ഗാന്ധി, ചന്ദ്രശേഖര് ആസാദ് തുടങ്ങിയ സ്വാതന്ത്ര്യസമര സേനാനികള്ക്കൊപ്പമാണ് സവര്ക്കറിന്റെ ചിത്രവും ഉള്പ്പെടുത്തിയിരുന്നത്. ഇതിനെതിരെ എസ്.ഡി.പി.ഐക്കാരനായ യുവാവ് പ്രതിഷേധിച്ചതിന്റെ വീഡിയോ സമൂഹമാധ്യമങ്ങളില് വ്യാപകമായി പ്രചരിച്ചിരുന്നു. സവര്ക്കര് സ്വാതന്ത്യസമര സേനാനിയല്ലെന്നും മറിച്ച് ദേശദ്രോഹിയാണെന്നും എസ്.ഡി.പി.ഐ പ്രവര്ത്തകര് പറഞ്ഞു.
സ്വാതന്ത്ര്യ സമര കാലത്ത് നിരവധി മുസ്ലിങ്ങള് രാജ്യത്തിന് വേണ്ടി ജീവന് ബലി നല്കിയിട്ടുണ്ടെന്നും അവരുടെയൊന്നും ചിത്രങ്ങള് എവിടേയും പ്രദര്ശിപ്പിച്ചു കണ്ടില്ലെന്നും പ്രതിഷേധക്കാര് പറഞ്ഞു.