മദ്യവും മയക്കുമരുന്നും ഉപേക്ഷിക്കും, ഖാദി സ്ഥിരമായി ധരിക്കും, പാര്‍ട്ടിയെ പരസ്യമായി വിമര്‍ശിക്കില്ല; അംഗത്വം നല്‍കാന്‍ സത്യവാങ്മൂലവുമായി കോണ്‍ഗ്രസ്
ഡൂള്‍ന്യൂസ് ഡെസ്‌ക്
Sunday, 24th October 2021, 9:59 am
ന്യൂദല്‍ഹി: കോണ്‍ഗ്രസ് പാര്‍ട്ടിയില്‍ അംഗത്വമെടുക്കേണ്ടവര്‍ ഇനി മുതല്‍ ചില നിബന്ധനകളും പാലിക്കണം. മദ്യവും മയക്കുമരുന്നും വര്‍ജിക്കുമെന്നും പാര്‍ട്ടിനയങ്ങളെ പൊതുവേദിയില്‍ വിമര്‍ശിക്കില്ലെന്നും മെമ്പര്‍ഷിപ്പ് ഫോമില്‍ സത്യവാങ്മൂലമായി നല്‍കണമെന്നാണ് നിര്‍ദേശം.
നിയമപ്രകാരം അനുവദനീയമായതിലും കൂടുതല്‍ വസ്തുവകകള്‍ സ്വന്തമായില്ലെന്നും പാര്‍ട്ടിയുടെ നയങ്ങളും പരിപാടികളും പ്രചരിപ്പിക്കാന്‍ കായികാധ്വാനവും ജോലിയും ചെയ്യാന്‍ മടിയില്ലെന്നും സത്യവാങ്മൂലത്തില്‍ വ്യക്തമാക്കണം.
താന്‍ പതിവായി ഖാദി ധരിക്കുന്നയാളാണെന്നും മെമ്പര്‍ഷിപ്പ് ഫോമില്‍ രേഖപ്പെടുത്തണം. ഇത്തരത്തില്‍ പത്ത് കാര്യങ്ങളാണ് സത്യവാങ്മൂലമായി നല്‍കേണ്ടത്.
നവംബര്‍ ഒന്നുമുതലാണ് കോണ്‍ഗ്രസിന്റെ അംഗത്വവിതരണം ആരംഭിക്കുക. അടുത്തവര്‍ഷം മാര്‍ച്ച് 31 വരെ ഇത് നീളും.
