മുംബൈ: കുതിച്ചുയരുന്ന ഇന്ധനവിലയില്‍ പ്രതികരിക്കാനില്ലേ എന്ന് അമിതാഭ് ബച്ചനോടും അക്ഷയ്കുമാറിനോടും അനുപം ഖേറിനോടും ചോദിച്ച് മഹാരാഷ്ട്ര കോണ്‍ഗ്രസ് അധ്യക്ഷന്‍ ഭായ് ജഗ്തപ്. ഇന്ധനവില 100 കടന്ന സാഹചര്യത്തിലാണ് മൂവര്‍ക്കും ജഗ്തപ് കത്തയച്ച് പ്രതിഷേധിച്ചത്.
കോണ്‍ഗ്രസ് നേതൃത്വത്തിലുള്ള യു.പി.എ സര്‍ക്കാരിന്റെ കാലത്ത് ഇന്ധനവില വര്‍ധിച്ചപ്പോള്‍ ട്വീറ്റ് ചെയ്ത് പ്രതിഷേധിച്ച ഇവര്‍ക്ക് ഇപ്പോഴൊന്നും പറയാനില്ലേ എന്നാണ് ജഗ്തപ് ചോദിച്ചത്.
‘ഉയര്‍ന്ന് വന്ന ഇന്ധന വിലയില്‍ മുമ്പ് ട്വീറ്റ് ചെയ്തവരാണ് ഇവര്‍. അതൊക്കെ നല്ലതാണ്. പക്ഷെ പെട്രോള്‍ വില നൂറും കടന്ന് ഉയര്‍ന്ന് കൊണ്ടിരിക്കുമ്പോള്‍ എന്തുകൊണ്ടാണ് ഇവരൊക്കെ ഇങ്ങനെ മിണ്ടാതിരിക്കുന്നത്?,’ കത്തിനെക്കുറിച്ച് ചോദിച്ചപ്പോള്‍ ജഗ്തപ് മറുപടി പറഞ്ഞു.
2012 ല്‍ അമിതാഭ് ബച്ചന്‍ ഇന്ധനവില വര്‍ധനയില്‍ ട്വീറ്റ് ചെയ്തു. അന്ന് 63 രൂപയായിരുന്നു പെട്രോള്‍ ലിറ്ററിന് വില. എന്നിട്ടെന്തുകൊണ്ടാണ് ഇപ്പോള്‍ ട്വീറ്റ് ചെയ്യാത്തതെന്നും അദ്ദേഹം ചോദിച്ചു.
