ജസ്റ്റിസ് അബ്ദുല്‍ നസീറിനെ ഗവര്‍ണറാക്കിയത് തെറ്റ്; കേന്ദ്ര സര്‍ക്കാര്‍ നടപടിയെ ശക്തമായി അപലപിക്കുന്നു: കോണ്‍ഗ്രസ്

ന്യൂദല്‍ഹി: സുപ്രീം കോടതി മുന്‍ ചീഫ് ജസ്റ്റിസ് എസ്. അബ്ദുല്‍ നസീറിനെ ഗവര്‍ണറാക്കിയ നടപടിയെ അപലപിച്ച് കോണ്‍ഗ്രസ്. എസ്. അബ്ദുല്‍ നസീറിനെ ആന്ധ്രാ ഗവര്‍ണറാക്കി നിയമിച്ചത് കേന്ദ്ര സര്‍ക്കാരിന്റെ തെറ്റായ സമീപനമാണെന്നും ശക്തമായി എതിര്‍ക്കുന്നുവെന്നും കോണ്‍ഗ്രസ് വക്താവ്  അഭിഷേക് മനു സിങ്‌വി പറഞ്ഞു.

വാര്‍ത്താസമ്മേളനത്തില്‍ വെച്ചായിരുന്നു സിങ്‌വിയുടെ പ്രതികരണം.

‘ഏതെങ്കിലും വ്യക്തികളെ സംബന്ധിക്കുന്ന പ്രശ്‌നമല്ല ഇത്. വ്യക്തിപരമായി എനിക്ക് അറിയാവുന്നയാളാണ് അദ്ദേഹം. മികച്ച വ്യക്തിത്വമാണ്. പക്ഷെ ഇവിടെ പ്രശ്‌നം അതല്ല.

പ്രത്യയശാസ്ത്രപരമായാണ് ഞങ്ങള്‍ ഈ നിയമനത്തെ എതിര്‍ക്കുന്നത്. ജുഡീഷ്യറിയുടെ സ്വാതന്ത്രമായ പ്രവര്‍ത്തനത്തിന് ഭീഷണിയാകുന്ന നടപടിയാണിതെന്ന് തന്നെയാണ് ഞങ്ങള്‍ കരുതുന്നത്.

അതുകൊണ്ട് തന്നെ കേന്ദ്ര സര്‍ക്കാരിന്റെ ഈ നടപടിയെ ഞങ്ങള്‍ ഏറ്റവും ശക്തമായി അപലപിക്കുന്നു, എതിര്‍ക്കുന്നു. ഈ നടപടിയെ ഒരു തരത്തിലും  അംഗീകരിക്കാനാകില്ല,’ അഭിഷേക് മനു സിങ്‌വി പറഞ്ഞു.

ആന്ധ്രാപ്രദേശ് ഗവര്‍ണറായി നിയമിച്ച അബ്ദുല്‍ നസീര്‍ മുത്തലാഖ്, നോട്ട് നിരോധനം കേസുകളില്‍ വിധി പുറപ്പെടുവിച്ച ജഡ്ജിയാണ്.

അയോധ്യ കേസില്‍ ബാബരി പള്ളി നിലനിന്നിരുന്ന സ്ഥലം രാമക്ഷേത്ര അവശിഷ്ടങ്ങളുള്ള ഇടമാണെന്നും പള്ളിയുടെ 2.77 ഏക്കര്‍ സ്ഥലം രാമക്ഷേത്ര നിര്‍മാണ ട്രസ്റ്റിന് നല്‍കണമെന്നും നിലപാടെടുത്ത സുപ്രീം കോടതി അഞ്ചംഗ ബെഞ്ചിലും അബ്ദുല്‍ നസീര്‍ അംഗമായിരുന്നു.

ഇക്കാര്യങ്ങള്‍ ചൂണ്ടിക്കാട്ടികൊണ്ട് വിവിധ പ്രതിപക്ഷ പാര്‍ട്ടി നേതാക്കള്‍ പ്രതികരണവുമായി രംഗത്തുവന്നിട്ടുണ്ട്.

ജുഡീഷ്യറിയില്‍ വരെ ബി.ജെ.പി സര്‍ക്കാര്‍ കയ്യേറ്റം നടത്തുകയാണെന്നും ഇത് അനുവദിച്ചുകൊടുക്കാനാകില്ലെന്നും നിരവധി പേര്‍ പറഞ്ഞു.

2017ല്‍ സുപ്രീം കോടതി ജഡ്ജിയായി നിയമതിനായ അബ്ദുല്‍ നസീര്‍ 2023 ജനുവരി നാലിനാണ് സുപ്രീം കോടതിയില്‍ നിന്ന് വിരമിച്ചത്.

പന്ത്രണ്ട് സംസ്ഥാനങ്ങളിലേക്കുള്ള ഗവര്‍ണര്‍മാരെയാണ് സര്‍ക്കാര്‍ നിയമച്ചിരിക്കുന്നത്. രാഷ്ട്രപതി ദ്രൗപതി മുര്‍മുവായിരുന്നു പ്രഖ്യാപനം നടത്തിയത്.

മുതിര്‍ന്ന ബി.ജെ.പി നേതാവും കേരളത്തിലെ ബി.ജെ.പിയുടെ മുന്‍ ചുമതലക്കാരനുമായിരുന്ന സി.പി. രാധാകൃഷ്ണനാണ് ജാര്‍ഖണ്ഡ് ഗവര്‍ണര്‍. ലഫ്. ജനറല്‍ കൈവല്യ ത്രിവിക്രം പര്‍നായിക് അരുണാചല്‍ പ്രദേശിലും ലക്ഷ്മണ്‍ പ്രസാദ് ആചാര്യ സിക്കിമിന്റെയും ഗവര്‍ണര്‍മാരാകും. ഗുലാബ് ചന്ദ് കഠാരിയ അസമിലും ശിവ പ്രതാവ് ശുക്ല ഹിമാചല്‍ പ്രദേശിലും ഗവര്‍ണര്‍മാരാകും.

പുതുതായി നിയമിച്ച ഗവര്‍ണര്‍മാര്‍

ലഫ്. ജനറല്‍ കൈവല്യ ത്രിവിക്രം പര്‍നായിക്- അരുണാചല്‍ പ്രദേശ്
റിട്ട. ജസ്റ്റിസ് എസ് അബ്ദുല്‍ നസീര്‍- ആന്ധ്രാപ്രദേശ്
ബിശ്വ ഭൂഷണ്‍ ഹരിചന്ദന്‍- ഛത്തീസ്ഗഢ്
സുശ്രി അനസൂയ ഉയിക്യെ- മണിപ്പൂര്‍
ലക്ഷ്മണ്‍ പ്രസാദ് ആചാര്യ- സിക്കിം
സി.പി. രാധാകൃഷ്ണന്‍- ജാര്‍ഖണ്ഡ്
എല്‍. ഗണേശന്‍- നാഗാലാന്‍ഡ്
ഫാഗു ചൗഹാന്‍- മേഘാലയ
രാജേന്ദ്ര വിശ്വനാഥ അര്‍ലേകര്‍- ബിഹാര്‍
റിട്ട. ബ്രിഗേഡിയര്‍ ഡോ. ബി.ഡി. മിശ്ര- ലഡാക്ക്
ശിവ പ്രതാപ് ശുക്ല- ഹിമാചല്‍ പ്രദേശ്
ഗുലാബ് ചന്ദ് കഠാരിയ- അസം

Content Highlight: Congress condemns Justice Abdul Nazeer’s appointment as Andhra Pradesh governor