ന്യൂദല്‍ഹി: ജെയ്‌ഷെ ഭീകരന് മസൂദ് അസറിന് ക്ലീന്‍ ചിറ്റ് നല്‍കിയ അജിത് ദോവലിനെ രാജ്യദ്രോഹിയെന്നു വിളിക്കാന്‍ ധൈര്യമുണ്ടോയെന്ന് ബി.ജെ.പിയോട് കോണ്‍ഗ്രസ്. 2010ല്‍ അജിത് ദോവല്‍ ഒരു അഭിമുഖത്തില്‍ പറഞ്ഞ കാര്യങ്ങള്‍ ഉയര്‍ത്തിക്കാട്ടിയാണ് കോണ്‍ഗ്രസ് നേതാവ് രണ്‍ദീപ് സിങ് സുര്‍ജേവാലയുടെ വെല്ലുവിളി.
“മോദി സര്‍ക്കാറിന്റെ ദേശീയ സുരക്ഷാ ഉപദേഷ്ടാവ് അജിത് ദോവല്‍ ഭീകരവാദി മസൂദ് അസറിനെ മോചിപ്പിച്ചതിന് ബി.ജെ.പി സര്‍ക്കാറിനെ കുറ്റപ്പെടുത്തിയിരുന്നു. മസൂദ് അസറിനെ മോചിപ്പിച്ചത് ഒരു രാഷ്ട്രീയ തീരുമാനമായിരുന്നെന്നാണ് ദോവല്‍ പറഞ്ഞത്.” ദോവലിന്റെ ഇന്‍ര്‍വ്യൂ ഭാഗങ്ങള്‍ ഉയര്‍ത്തിക്കാട്ടി സുര്‍ജേവാല ട്വീറ്റു ചെയ്യുന്നു.
” ഈ ദേശദ്രോഹപ്രവര്‍ത്തനം ചെയ്‌തെന്ന് ഇപ്പോഴെങ്കിലും സമ്മതിക്കാന്‍ കേന്ദ്രമന്ത്രി രവി ശങ്കര്‍ പ്രസാദും പ്രധാനമന്ത്രി നരേന്ദ്രമോദിയും തയ്യാറാണോ.?” അദ്ദേഹം ചോദിക്കുന്നു.
“തീവ്രവാദിയായ മസൂദ് അസറിന് മോദി സര്‍ക്കാറിലെ എന്‍.എസ്.എ അജിത് ദോവല്‍ ക്ലീന്‍ ചിറ്റ് നല്‍കിയത് വെളിവായിരിക്കുകയാണ്. മസൂദ് അസറിന് എങ്ങനെയാണ് ഒരു ഐ.ഇ.ഡി സൃഷ്ടിക്കേണ്ടതെന്ന് അറിയില്ല. അയാള്‍ക്ക് ഉന്നംപിഴക്കാതെ വെടിവെക്കാന്‍ അറിയില്ല. മസൂദിനെ മോചിപ്പിച്ചശേഷം ജമ്മുകശ്മീരിലെ ടൂറിസം 200% വര്‍ധിച്ചു.” എന്നൊക്കെയാണ് അഭിമുഖത്തില്‍ ദോവല്‍ പറഞ്ഞത്.
തീവ്രവാദത്തെ അടിച്ചമര്‍ത്തുന്നതില്‍ യു.പി.എ സര്‍ക്കാര്‍ സ്വീകിരച്ച പോളിസിയേയും ദോവല്‍ അഭിമുഖത്തില്‍ അഭിനന്ദിക്കുന്നുണ്ട്. ” നുഴഞ്ഞുകയറ്റത്തിനെതിരെ മികച്ച നയവുമായി യു.പി.എ-കോണ്‍ഗ്രസ് സര്‍ക്കാര്‍ വന്നു. യാതൊരു ഇളവും നല്‍കിയില്ല. ” എന്നാണ് അഭിമുഖത്തില്‍ ദോവല്‍ പറഞ്ഞത്.
വാജ്‌പേയി സര്‍ക്കാര്‍ മസൂദ് അസറിനെ വിട്ടുകൊടുത്ത കാര്യം ചൂണ്ടിക്കാട്ടി ബി.ജെ.പിയ്‌ക്കെതിരെ വിമര്‍ശനവുമായി കഴിഞ്ഞദിവസം രാഹുല്‍ ഗാന്ധി രംഗത്തെത്തിയിരുന്നു. 1999 ല്‍ കാണ്ഡഹാറില്‍ വിമാനം തട്ടിയെടുത്ത ഭീകരവാദികളുടെ ആവശ്യം മസൂദ് അസറിനെ വിട്ടുകൊടുക്കുക എന്നതായിരുന്നു. ബി.ജെ.പി ഭരണകാലത്താണ് മസൂദ് അസറിനെ വിട്ടയച്ചതെന്നായിരുന്നു രാഹുലിന്റെ പ്രസംഗം.
കാണ്ഡഹാര്‍ വിമാനറാഞ്ചലിനു ശേഷം ഇപ്പോഴത്തെ ദേശീയ സുരക്ഷാ ഉപദേഷ്ടാവ് അജിത്ത് ഡോവലും സംഘവും മസൂദ് അസറിനെ അനുഗമിക്കുന്ന ചിത്രവും രാഹുല്‍ പുറത്തുവിട്ടിരുന്നു.
मोदीजी के NSA, श्री अजित डोभाल ने उग्रवादी मसूद अजहर को विस्फोटक व बंदूक़ चलाने की जानकारी भी न होने का दिया ‘क्लीन चिट सर्टिफ़िकेट’-
1 मसूद को IED बम बनाना भी नहीं आता
2 मसूद को निशाना लगाना नहीं आता
3 अज़हर को रिहा करने के बाद टूरिज्म में 200% की वृद्धि#BJPLovesTerrorists
2/3 pic.twitter.com/u0Vyn8ptja— Randeep Singh Surjewala (@rssurjewala) March 12, 2019