പേരു പറയുന്നില്ല,അഴിമതിയുടെ മാഫിയയാണ് അയാള്‍; മന്ത്രിസഭയില്‍ നിന്നും അഴിമതിക്കാരനെ ഒഴിവാക്കണമെന്ന് ഗെലോട്ടിനോട് കോണ്‍ഗ്രസ് എം.എല്‍.എ
ഡൂള്‍ന്യൂസ് ഡെസ്‌ക്
Wednesday, 16th September 2020, 1:42 pm
രാജസ്ഥാന്‍: രാജസ്ഥാനില്‍ തലവേദന ഒഴിയാതെ അശോക് ഗെലോട്ട് സര്‍ക്കാര്‍. സര്‍ക്കാറിനകത്ത് അഴിമതിക്കാരനായ ഒരു മന്ത്രിയുണ്ടെന്നും എത്രയും പെട്ടെന്ന് മന്ത്രി സഭയില്‍ നിന്ന് അഴിമതിക്കാരനെ ഒഴിവാക്കണമെന്നും ആവശ്യപ്പെട്ട് കോണ്‍ഗ്രസ് എം.എല്‍.എ രംഗത്ത്.
രാജസ്ഥാന്‍ മുഖ്യമന്ത്രി അശോക് ഗെലോട്ടിനെഴുതിയ കത്തിലാണ് കോണ്‍ഗ്രസ് എം.എല്‍.എ ആയ ഭരത് സിംഗ് കുന്തന്‍പൂര്‍ ഇക്കാര്യം ആവശ്യപ്പെട്ടത്.
അഴിമതിയുടെ മാഫിയയായ ആ മന്ത്രിയുടെ പേര് പറയാന്‍ താന്‍ ആഗ്രഹിക്കുന്നില്ലെന്നും മന്ത്രി സഭയിലെ കൊടിയ അഴിമതിക്കാരനായ മന്ത്രിയെ ഒഴിവാക്കിക്കൊണ്ട് ജനങ്ങള്‍ക്ക് സന്ദേശം നല്‍കണമെന്നും അദ്ദേഹം ഗെലോട്ടിനോട് ആവശ്യപ്പെട്ടു.
നേരത്തെ മദ്യം കൊറോണ വൈറസിനെ കൊല്ലുമെന്ന അവകാശവാദവുമായി ഇതേ എം.എല്‍.എ രംഗത്തെത്തിയിരുന്നു.
