| Monday, 23rd March 2020, 7:47 pm

ബീവറേജസ് ഔട്ട്‌ലെറ്റുകള്‍ അടയ്ക്കില്ലെന്ന് മുഖ്യമന്ത്രി; തീരുമാനം സാമൂഹിക പ്രത്യാഘാതങ്ങള്‍ പരിഗണിച്ച്; 'അത്തരമൊരു ആപത്തിലേക്ക് പോയിക്കൂടാ എന്ന് നിര്‍ബന്ധമുണ്ട്'

ഡൂള്‍ന്യൂസ് ഡെസ്‌ക്

തിരുവനന്തപുരം: കൊവിഡ് വ്യാപനത്തെത്തുടര്‍ന്ന് സംസ്ഥാനത്ത് ലോക്ഡൗണ്‍ ആണെങ്കിലും ബീവറേജസ് ഔട്ട്‌ലെറ്റുകള്‍ തുറന്ന് പ്രവര്‍ത്തിക്കുമെന്ന് മുഖ്യമന്ത്രി പിണറായി വിജയന്‍. പഞ്ചാബ് മുഖ്യമന്ത്രി അമരീന്ദര്‍ സിങിന്റെ ട്വീറ്റ് എടുത്തുപറഞ്ഞായിരുന്നു മുഖ്യമന്ത്രി ഇക്കാര്യം വിശദീകരിച്ചത്.

“പാല്, ഭക്ഷ്യ ഉല്‍പ്പന്നങ്ങള്‍, മരുന്ന്, ബീവറേജസ് എന്നിവയുടെ വില്‍പനയടക്കം അവശ്യമായ എല്ലാ സര്‍ക്കാര്‍ സേവനങ്ങളും തുടരും എന്നാണ് അമരീന്ദര്‍ സിങ് ട്വീറ്റ് ചെയ്തത്. ഇങ്ങനെയാണ് നമ്മുടെ രാജ്യം. ബീവറേജസ് ഒഴിവാക്കുന്ന നില വന്നാല്‍, ഒരുപാട് സമൂഹിക പ്രത്യാഘാതങ്ങള്‍ ഉണ്ടാവും. അത്തരമൊരു ആപത്തിലേക്ക് പോയിക്കൂടാ എന്ന് സര്‍ക്കാരിന് നിര്‍ബന്ധമുണ്ട്”.

“എന്നാല്‍, മറ്റ് കാര്യങ്ങള്‍ എങ്ങനെയൊക്കെ നിയന്ത്രിക്കണം എന്ന കാര്യങ്ങള്‍ സര്‍ക്കാര്‍ ആലോചിക്കുന്നതിന്റെ ഭാഗമായി ബാറുകള്‍ വേണ്ടെന്ന് ഇപ്പോള്‍ത്തന്നെ തീരുമാനിച്ചിട്ടുണ്ട്. ബാറിന് അകത്തുകയറി മദ്യം കഴിക്കുന്ന നില ഉണ്ടാവരുത്. കൗണ്ടര്‍ വില്‍പന വേണമെങ്കില്‍ അനുവദിക്കാവുന്നതാണ്”, പിണറായി വിജയന്‍ വാര്‍ത്താ സമ്മേളനത്തില്‍ പറഞ്ഞു.

കൊവിഡ് 19 ബാധയുടെ പശ്ചാത്തലത്തില്‍ കളക്ഷന്‍ എടുക്കുന്നത് രണ്ട് മാസത്തേക്ക് നിര്‍ത്തണമെന്ന് മൈക്രോ ഫിനാന്‍സ് കമ്പനികളോട് ആവശ്യപ്പെട്ട് മുഖ്യമന്ത്രി പിണറായി വിജയന്‍. പല കളക്ഷന്‍ ഏജന്റുമാരും വീടുകളില്‍ ചെന്നിരുന്ന് കുടുംബിനികളെ ബുദ്ധിമുട്ടിക്കുന്ന അവസ്ഥയുണ്ടെന്നും അത് അനുവദിക്കാവുന്നതല്ലെന്നും അതിനാല്‍ രണ്ട് മാസത്തേക്ക് കളക്ഷന്‍ രണ്ട് മാസത്തേക്ക് നിര്‍ത്തണമെന്നുമാണ് മുഖ്യമന്ത്രി ആവശ്യപ്പെട്ടത്.

സംസ്ഥാനത്ത് മാര്‍ച്ച് 31 വരെ മുഖ്യമന്ത്രി ലോക്ഡൗണ്‍ പ്രഖ്യാപിച്ചു. സംസ്ഥാനത്തിന്റെ അതിര്‍ത്തികള്‍ അടച്ചിടാനും തീരുമാനമായി. അവശ്യസാധനങ്ങളുടെ ലഭ്യത ഉറപ്പാക്കുമെന്ന് മുഖ്യമന്ത്രി ഉറപ്പു നല്‍കി. ആശുപത്രികളും പെട്രോള്‍ പമ്പുകളും തുറന്നു പ്രവര്‍ത്തിക്കും.

അതേസമയം കേരളത്തില്‍ ഇന്ന് 28 പേര്‍ക്ക് കൂടി കൊവിഡ് സ്ഥിരീകരിച്ചു. ഇതില്‍ 25 പേര്‍ വിദേശത്ത് നിന്ന് വന്നവരാണ്.

കാസര്‍ഗോഡ് ജില്ലയില്‍ അനാവശ്യമായി പുറത്തിറങ്ങുന്നവരെ അറസ്റ്റ് ചെയ്യുമെന്നും ഇവര്‍ക്ക് കനത്ത പിഴ ചുമത്തുമെന്നും മുഖ്യമന്ത്രി പറഞ്ഞു.

ജില്ലകളില്‍ പ്രത്യേക കൊവിഡ് ആശുപത്രികള്‍ ആരംഭിക്കുമെന്നും അദ്ദേഹം പറഞ്ഞു. അവശ്യ സാധനങ്ങള്‍ വില്‍ക്കുന്ന കടകള്‍ രാവിലെ 7 മുതല്‍ അഞ്ചുമണിവരെ മാത്രമേ പ്രവര്‍ത്തിക്കാന്‍ പാടുള്ളു.

ഇതില്‍ കാസര്‍ഗോഡ് ജില്ലയില്‍ രാവിലെ 11 മണി മുതല്‍ വൈകീട്ട് 5 മണിവരെയായിരിക്കും കടകള്‍ പ്രവര്‍ത്തിക്കേണ്ടത്. അതേസമയം മെഡിക്കല്‍ സ്റ്റോറുകള്‍ക്ക് ഈ സമയക്രമം ബാധകമല്ല.

പൊതുഗതാഗതം ഉണ്ടാവില്ലെന്നും എന്നാല്‍ സ്വകാര്യവാഹനങ്ങള്‍ അനുവദിക്കുമെന്നും മുഖ്യമന്ത്രി വാര്‍ത്താ സമ്മേളനത്തില്‍ വ്യക്തമാക്കി.

ആരാധനാലയങ്ങളില്‍ പൊതുജനങ്ങള്‍ക്ക് പ്രവേശനമുണ്ടാവില്ല. സംസ്ഥാനത്തെ റസ്റ്റോറന്റുകള്‍ പൂട്ടാനും തീരുമാനമായിട്ടുണ്ട്. എന്നാല് ഹേം ഡെലിവറികള്‍ അനുവദിക്കും.

അതിഥി തൊഴിലാളികള്‍ക്ക് തൊഴില്‍ ഇല്ലാത്ത സാഹചര്യമാണ് ഉള്ളത് ഇവര്‍ക്ക് ഭക്ഷണം ഉറപ്പ് വരുത്തുമെന്നും അവര്‍ക്ക് താമസത്തിനുള്ള പ്രത്യേക ക്യാമ്പും പരിശോധനയും നടപ്പിലാക്കുമെന്നും മുഖ്യമന്ത്രി പറഞ്ഞു.

ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ

We use cookies to give you the best possible experience. Learn more