തിരുവനന്തപുരം: കാസര്‍കോട്ടെ പൊട്ടിത്തെറിക്ക് പിന്നാലെ തിരുവനന്തപുരം ബി.ജെ.പിയിലും രാജി. കെ.സുരേന്ദ്രന്‍ സംസ്ഥാന അധ്യക്ഷനായി ചുമതലയേറ്റെടുത്തതിന് പിന്നാലെ നടത്തിയ മണ്ഡലം ഭാരവാഹി നിര്‍ണയവുമായി ബന്ധപ്പെട്ടാണ് തിരുവനന്തപുരത്ത് പൊട്ടിത്തെറി. ഭാരവാഹി നിര്‍ണയത്തില്‍ പ്രതിഷേധിച്ച് യുവമോര്‍ച്ച സംസ്ഥാന സമിതി അംഗം എസ്. മഹേഷ് കുമാര്‍ രാജിവെച്ചു.
തിരുവനന്തപുരം മണ്ഡലത്തില്‍ കൂടുതല്‍ വോട്ടുകള്‍ നേടിയ നേതാവിനെ ഭാരവാഹി നിര്‍ണയത്തില്‍നിന്നും ഒഴിവാക്കിയതില്‍ പ്രതിഷേധിച്ചാണ് രാജി.
കെ.സുരേന്ദ്രന്‍ സംസ്ഥാന അധ്യക്ഷ ചുമതല ഏറ്റെടുത്ത ശേഷം തിരുവനന്തപുരത്ത് നാല് മണ്ഡലങ്ങളില്‍ പ്രസിഡന്റുമാരെ നിയമിച്ചിരുന്നു. ഗ്രൂപ്പ് തര്‍ക്കത്തെത്തുടര്‍ന്ന് ഭാരവാഹി നിര്‍ണയങ്ങള്‍ മാറ്റിവെച്ചിരിക്കുകയായിരുന്നു.
സംസ്ഥാനാധ്യക്ഷന്‍ ഗ്രൂപ്പടിസ്ഥാനത്തിലാണ് ഭാരവാഹികളെ തെരഞ്ഞെടുക്കുന്നതെന്നും അദ്ദേഹം ഗ്രൂപ്പ് കളിക്ക് കൂട്ടുനില്‍ക്കുകയാണെന്നും രാജിവെച്ച മഹേഷ് കുമാര്‍ പറഞ്ഞു. പാര്‍ട്ടിയില്‍നിന്നും 200 ഓളം പേര് രാജിക്കൊരുങ്ങുകയാണെന്നും അദ്ദേഹം കൂട്ടിച്ചേര്‍ത്തു.
തിരുവനന്തപുരം മണ്ഡലം പ്രസിഡന്റ് സ്ഥാനത്തേക്ക് നടത്തിയ വോട്ടെടുപ്പില്‍ വലിയശാല പ്രവീണായിരുന്നു കൂടുതല്‍ വോട്ടുകള്‍ നേടിയത്. എന്നാല്‍ ഇദ്ദേഹത്തെ പരിഗണിക്കാതെ മൂന്നാം സ്ഥാനത്തെത്തിയ കൗണ്‍സിലര്‍ കൂടിയായ എസ്.കെ.പി രമേശിനെയാണ് പ്രസിഡന്റായി തെരഞ്ഞെടുത്തത്. ഇതോടെ മണ്ഡലത്തിലെ ഒരു വിഭാഗം പ്രവര്‍ത്തകര്‍ പ്രതിഷേധവുമായി രംഗത്തെത്തിയിരിക്കുകയാണ്.
കഴിഞ്ഞ ദിവസം കാസര്‍കോടും സമാന രീതിയില്‍ രാജി ഉണ്ടായിരുന്നു. കാസര്‍കോട് ജില്ലാ അധ്യക്ഷനായി അഡ്വ. കെ ശ്രീകാന്തിനെ വീണ്ടും നിയമിച്ചതിന് പിന്നാലെ ഇതില്‍ പ്രതിഷേധിച്ച് മുതിര്‍ന്ന നേതാവ് രവീശ തന്ത്രി കുണ്ടാര്‍ പാര്‍ട്ടി സംസ്ഥാന സമിതി അംഗത്വം രാജി വെച്ചു.
അധ്യക്ഷ സ്ഥാനത്തേക്ക് ശ്രീകാന്തിന്റെയും രവീശ തന്ത്രിയുടെയും പേര് ഉയര്‍ന്നുവന്നിരുന്നെങ്കിലും ശ്രീകാന്തിനെ തെരഞ്ഞെടുക്കുകയായിരുന്നു. നാലാം തവണയാണ് ശ്രീകാന്ത് അധ്യക്ഷ സ്ഥാനത്തേക്കെത്തുന്നത്. നിയമസഭാ തെരഞ്ഞെടുപ്പില്‍ രവീശതന്ത്രി കാസറകോട് സ്ഥാനാര്‍ത്ഥിയായി മത്സരിച്ചിരുന്നു. മഞ്ചേശ്വരം ഉപ തെരഞ്ഞെടുപ്പിലും ഇദ്ദേഹം മത്സരിച്ചിരുന്നു.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ