കാര്‍ഷിക നിയമം പോലെ പൗരത്വ നിയമവും പിന്‍വലിക്കണം; എന്‍.ഡി.എ സഖ്യകക്ഷിയോഗത്തില്‍ ആവശ്യമുന്നയിച്ച് എന്‍.പി.പി; ബി.ജെ.പിക്ക് തലവേദന
ഡൂള്‍ന്യൂസ് ഡെസ്‌ക്
Sunday, 28th November 2021, 9:54 pm
ന്യൂദല്‍ഹി: കാര്‍ഷിക നിയമങ്ങള്‍ക്ക് പിന്നാലെ പൗരത്വ നിയമങ്ങളും പിന്‍വലിക്കണമെന്നാവശ്യവുമായി എന്‍.ഡി.എ സഖ്യകക്ഷിയായ നാഷണല്‍ പീപ്പിള്‍സ് പാര്‍ട്ടി.
ന്യൂദല്‍ഹിയില്‍ പാര്‍ലമെന്റ് ശീതകാല സമ്മേളനത്തിന് മുന്നോടിയായി വിളിച്ചുചേര്‍ത്ത എന്‍.ഡി.എ യോഗത്തിലായിരുന്നു എന്‍.പി.പി എം.പി അഗത സാങ്മ പൗരത്വനിയമം പിന്‍വലിക്കണമെന്ന് ആവശ്യമുന്നയിച്ചത്.
‘കര്‍ഷകരുടെ വികാരം മുന്‍നിര്‍ത്തി കാര്‍ഷിക നിയമങ്ങള്‍ റദ്ദാക്കി. വടക്കുകിഴക്കന്‍ സംസ്ഥാനങ്ങളിലെ ജനങ്ങളുടെ പ്രശ്നവും ഉള്‍ക്കൊണ്ട് പൗരത്വ നിയമവും പിന്‍വലിക്കുന്ന കാര്യം പരിഗണിക്കണമെന്ന് യോഗത്തില്‍ സര്‍ക്കാരിനോട് അഭ്യര്‍ത്ഥിച്ചു’ എന്നായിരുന്നു യോഗം കഴിഞ്ഞ് പുറത്തിറങ്ങിയ സാങ്മ മാധ്യമങ്ങളോട് പ്രതികരിച്ചത്.
