ദുല്‍ഖര്‍ സല്‍മാന്‍ ചിത്രം ചുപിന്റെ ബിഹൈന്‍ഡ് ദി സീന്‍സ് പുറത്ത് വിട്ട് അണിയറപ്രവര്‍ത്തകര്‍. പെന്‍ മൂവിസ് ചാനലിലൂടെയാണ് ചിത്രത്തിന്റെ ഷൂട്ടിനിടയില്‍ നടന്ന രസകരമായ സംഭവങ്ങള്‍ പങ്കുവെച്ചത്.
ദുല്‍ഖര്‍ വളരെ മികച്ച അഭിനേതാവാണെന്നാണ് ചിത്രത്തിന്റെ കോ റൈറ്ററായ രാജാ സെന്‍ വീഡിയോയില്‍ പറയുന്നത്. അദ്ദേഹത്തിന്റെ എല്ലാ വര്‍ക്കുകളും ഞങ്ങള്‍ക്ക് ഇഷ്ടമാണ്. ഈ കഥാപാത്രത്തിന് പ്രത്യേക ചാം വേണമായിരുന്നുവെന്നും രാജ പറഞ്ഞു.
ജനങ്ങള്‍ക്ക് ഒരു ഫിക്‌സ്ഡ് ഇമേജില്ലാത്ത അഭിനേതാവിനെ ആയിരുന്നു വേണ്ടതെന്ന് സംവിധായകന്‍ ആര്‍. ബാല്‍കി പറഞ്ഞു. ദുല്‍ഖര്‍ വലിയ സൂപ്പര്‍ സ്റ്റാറാണ്. ഇവിടെയും പോപ്പുലറായ ആക്ടറാണ്. പക്ഷേ മറ്റ് താരങ്ങളെ വെച്ച് നോക്കുമ്പോള്‍ അദ്ദേഹത്തിന് ഒരു ഫ്രെഷായ ഇമേജുണ്ട്.
സെറ്റില്‍ ദുല്‍ഖര്‍ വളരെ കാമാണെന്നും ചുറ്റും എപ്പോഴും ഒരു ഓറയുണ്ടെന്നും വീഡിയോയില്‍ ചുപ് ടീമംഗങ്ങള്‍ പറയുന്നുണ്ട്. അദ്ദേഹം ഈ പ്ലാനെറ്റിലെ തന്നെ ഏറ്റവും പ്രിയങ്കരനായ വ്യക്തിയാണ്. വളരെ സൗമ്യനാണ്. ക്രൂവിലെ എല്ലാവരേയും ഇഷ്ടമാണെന്നും വീഡിയോയില്‍ അംഗങ്ങള്‍ പറഞ്ഞു. എല്ലാവരേയും ഇഷ്ടമാണെന്ന് പറഞ്ഞ് കേക്ക് മുറിക്കുന്ന ദുല്‍ഖറിനെയാണ് വീഡിയോയുടെ അവസാനം കാണുന്നത്.
സെപ്റ്റംബര്‍ 23ന് തിയേറ്ററുകളിലെത്തിയ ചിത്രം ബോക്‌സ് ഓഫീസില്‍ മികച്ച പ്രകടനമാണ് കാഴ്ചവെക്കുന്നത്. 10 കോടി ബജറ്റിലെത്തിയ ചിത്രം മൂന്ന് ദിവസം കൊണ്ട് ഏഴ് കോടിയാണ് നേടിയത്.
സമീപകാലത്ത് പുറത്ത് ഇറങ്ങിയ ബോളിവുഡ് റിലീസുകളെ അപേക്ഷിച്ച് ഒരു ചെറിയ ചിത്രമാണെങ്കിലും തിയേറ്ററുകളില്‍ മികച്ച ഓപ്പണിങ് നേടാന്‍ ചുപിന് കഴിഞ്ഞിട്ടുണ്ട്. ഏകദേശം 2.5-3 കോടി രൂപയാണ് ചുപിന്റെ ആദ്യ ദിന കളക്ഷന്‍. തിയേറ്ററുകളില്‍ മികച്ച പ്രേക്ഷക ശ്രദ്ധ നേടി ചിത്രം വിജയകരമായി പ്രദര്‍ശനം തുടരുകയാണ്.
മുംബൈ നഗരത്തില്‍ നടക്കുന്ന ഒരു സിനിമ നിരൂപകന്റെ കൊലപാതകത്തില്‍ നിന്നാണ് സിനിമ ആരംഭിക്കുന്നത്. സമാന രീതിയില്‍ നഗരത്തില്‍ പിന്നെയും സിനിമ നിരൂപകര്‍ കൊല്ലപ്പെടുന്നു. ഇതിനു പിന്നില്‍ ഒരു സീരിയല്‍ കില്ലറുണ്ടെന്ന് അന്വേഷണ സംഘം കണ്ടെത്തുന്നു. ഈ കില്ലറിലേക്കുള്ള അന്വേഷണമാണ് ചിത്രം.
Content Highlight: chup team released behind the scenes of the movie