യുവന്റസ് ടീമിലെ തന്റെ അരങ്ങേറ്റം ഗംഭീരമാക്കി സൂപ്പര്‍ താരം ക്രിസ്റ്റ്യാനോ റൊണാള്‍ഡോ. ക്രിസ്റ്റ്യാനോ ആദ്യമായി ഇറങ്ങിയ മത്സരത്തില്‍ യുവന്റസ് ബി ടീമിനെ എതിരില്ലാത്ത അഞ്ച് ഗോളുകള്‍ക്കാണ് ക്രിസ്റ്റ്യാനോയുടെ ടീം തകര്‍ത്തത്.
കളി തുടങ്ങി എട്ടാം മിനുട്ടില്‍ തന്നെ റൊണാള്‍ഡോ ഗോള്‍ നേടി, ക്ലബിനായുള്ള താരത്തിന്റെ ആദ്യ ഗോള്‍. വളരെ അനായാസമാണ് ദുര്‍ബലരായ യുവന്റസ് ബി ടീമിന്റെ വലയില്‍ ക്രിസ്റ്റ്യാനോ പന്തെത്തിച്ചത്.
യുവന്റസിന് വേണ്ടി അര്‍ജന്റീനന്‍ താരം പൗലോ ഡൈബാല ഇരട്ട ഗോളുകള്‍ നേടിയപ്പോള്‍ കാപ്പെല്ലിനി, മാര്‍ച്ചിസിയോ എന്നിവരാണ് മറ്റ് ഗോളുകള്‍ നേടിയത്.
റയല്‍ മാഡ്രിഡില്‍ നിന്നും യുവന്റസിലേക്ക് താരം കൂടുമാറിയ വാര്‍ത്ത ഞെട്ടലോടെയാണ് ഫുട്‌ബോള്‍ ലോകം കേട്ടത്. ആദ്യ മത്സരത്തില്‍ യുവന്റസ് ടീമുമായി നല്ല ഒത്തിണക്കത്തോടെയാണ് കളിച്ചത്.
ഈ സീസണില്‍ ക്രിസ്റ്റ്യാനോയുടെ വരവൊടെ വലിയ ആരാധക പിന്തുണയാണ് യുവന്റസിനുള്ളത്. താരതമ്യേന അപ്രധാനമായ മത്സരം ആണെങ്കിലും വന്‍ തിരിക്കാണ് യുവന്റസ് എ, ബി ടീമുകള്‍ തമ്മിലുള്ള മത്സരം കാണാന്‍ അനുഭവപ്പെട്ടത്. ഇത് ക്രിസ്റ്റ്യാനോയുടെ സാന്നിധ്യം കൊണ്ട് മാത്രമായിരുന്നു.